GIPARADA ang dakong bandila sa nasud sa walo ka mga historical sights sa Siyudad sa Cagayan de Oro, atol sa ika-121 nga Independence Day, Hunyo 12, 2019 ug gipataas sa dakong flagpole sa Divisoria.
Ang maong bandila dunay gidak-on nga 16 x 36 feet nga gibitbit sa representante sa 24 ka mga nagkadaiyang sektor diin duha ka indibidwal nga babaye ug lalaki gikan sa Philippine Army, Coast guard, Bureau of Fire, Bureau of Jail Management and Penology (BJMP), Philippine National Police (PNP), Mason, Department of Education (DepEd), Muslim Community, Boy scout, Indigenous People (IP), Archdiocese ug Girls’ Scout.
Sa pakighinabi kang Roberto Villaluz, Administrative Officer IV sa City Administrator’s Office kinsa upat na ka tuig nga nangulo niining parada sa bandila, niingong nga ang mga naggunit sa maong bandila mao ang nagkadaiyang sektor kinsa nagrepresentar usab sa komunidad ilabi na ang sektor sa paghatag og seguridad ug mga nakatabang sa kalamboan sa nasud.
“They are representing all sectors of the society specially the security sector nga nagpart siya sa development sa Philippine government,” matud ni Villaluz.
Nasayran nga niagi kini sa walo ka historical sights sa siyudad sama sa executive building sa siyudad nga kanhi Casa Real, St. Augustine Cathedral Church, water tank, gaston park, maternity, Casa del Chino Igua, Plaza Divisoria paingon sa Amphitheatre ug sa Kiosko Kagawasan.
Gipangulohan mismo ni Cagayan de Oro Mayor Oscar Moreno ang maong kalihokan kauban ang kadagkoan sa mga kasundalohan ug kapulisan.
“The independence that we need is not only our own independence but also for the independence of others, for as long as there are people, there remain people who are dependent then independence is not achieve,” pahayag ni Moreno.
Gitapos usab ang maong kalihokan pinaagi na usab sa paghatag sa mga libo-an ka mga nilung-ag nga itlog sa nitambong atol sa maong kasaulogan diin unang giporma og mapa sa Pilipinas.