TIKLO ang usa ka policewoman sa gipahigayong entrapment operation niadtong alas 3 sa hapon, Martes, Hunyo 11, sulod sa usa ka fast food chain sa Divisoria, Siyudad sa Cagayan de Oro.
Naila ang dinakpan nga si patrol woman Sheryl Lou Licayan, 38, taga Macanhan, Barangay Carmen ug sakop sa Cagayan de Oro City Police Office (Cocpo).
Sa pakighinabi kang Police Liutenant Colonel Mardy Hortillosa, tigpamaba sa Cocpo, gibutyag nga nagpahigayon og joint entrapment operation ang Regional Intelligence Division-Northern Mindanao ug kapulisan sa Police Station 1 sa Divisoria hinungdan sa pagkasikop sa pulis.
“Allegedly nang extort kani siya og kwarta nga P3,000 nga gihimo nga mark money sa usa ka non-uniform applicant (NUP) sa Camp Alagar. Ang ka transaction mismo sa maong personnel ang kadtong nag-complain mismo nga aplikante,” matud ni Hortillosa.
Giingong baylo sa maong kantidad ang pagpasalig nga makasulod kini sa gi-aplayan nga posisyon.
“In return sa kwarta nga gihatag, gipasaligan siya nga makuha siya sa NUP sa posisyon nga iyang gi-aplayan,” dugang niini.
Padayon ang imbestigasiyon sa kapulisan karong panahona kalabot na sa maong insidente ug kung duna kini mga kauban ug gitan-aw pa usab kung duna na kini lain pang mga nabiktima.
Gikabutyag usab nga napulo na ka tuig kini sa serbisyo ug duna na’y mga reklamo batok kaniya.