NAGSULAT si Ellen kang Treb diha sa iyang laptop.Samtang ang iyang mga tudlo nagpadayon pagpanulpok sa mga letra sa keyboard, naghingos-hingos siya. Wa niya kapugngi ang pagtulo sa iyang mga luha nga misubay sa daganasan sa iyang mga aping.
“Treb, kini na ang katapusan kong pakig-kontak nimo. Mopahungaw lang ko sa akong gibati. Gihigugma ko ikaw sa tiunay ug misaad kanimo nga hangtod sa kamatayon ang gugma ko kanimo. Mao sab kini ang imong gisaad nako. Matod mo, way makalumpag sa wagas ug dalisay mong gugma kanako, bisan maglinog pa ug maglipak o magbagyo man. Tungod niini, misalig ko nimo kay nakita ug nasinati ko man sa ngadto-ngadto ang imong kabuotan, Nakaher sab ko sa imong kaambungan, Guwapo ka ug daghan ang mga dalaga nga nangandoy nga ikaw mopadayag sa imong gugma ngadto nila. Lakip na niini silang Rizza ug Dianne, akong mga kauban sa accounting dept. sa among kompaniya nga gipaila-ila ko kanimo, dihang una kang nakaadto sa among opisina aron pagkuha nako usa ka hapon sa tingpamauli alang sa una natong dinner date.
“I’m very happy to have you as my sweetheart, darling!” miingon ka usa ka higayon nga mitan-aw tag sine sa SM City. Giingnan tika nga mao sab kini ang akong gibati alang kanimo. Malipayon kita sa atong panagkuyog sa panagtigom nga atong gitambungan, sama sa mga birthday party ug wedding sa atong mga higala ug mga kaila.
Di ko mahikalimot sa una mong paghalok sa akong mga ngabil. Nahitabo kini sa ikaduha natong pagpanan-aw sa sine sa SM City gihapon. Ang salida kay ‘remake’ sa Affair to Remember. Dihang naghalok ang bidang lalake ug ang bidang babaye didto sa Eifel Tower, giwaling mo ang akong nawong atubang nimo. Wa ko motukol nga giukoban sa imog mga ngabil ang akong mga ngabil. Gidawat ko nga malipayon ang unang halok sa akong kinabuhi gikan sa unang lalake nga gihigugma ko sa tim-os.
Laing higayon nga dili gyud nako malimtan mao kadtong dinner date sa unang anibersaryo sa atong relasyon isip managhigugmaay. Gihatagan mo akog kuwentas nga bulawan isip anniversary gift. May gipangayo ka kanako nga wa pod ko kabalibad kay lagi, I love you so much, ug misalig ko sa imong kabuotan. Sakay sa imong awto nangadto ta Kingsland sa NRA sa Mabolo. Didto gitugyan ko kanimo sa way pagpanuko ang lawas kog kalag, Matagbawon ang pagdimdim ta sa katam-is sa atong gugma ug pagminahalay.
Apan mabalhinon gyud ang dagan sa panahon. Human adtong ‘affair to remember’ nato, kalit lang nga nawala ka sa akong kalibutan. Gikontak tika sa selpon, wa na ka motubag sa akong text or call. Gitawgan ko ang inyong kompaniya ug nahibaw-an nako nga tua na ka sa Manila idestino. Daghang mga gabii nga ako naghilak sulod sa akong lawak, ilabi na dihang miturok na ang liso sa kinabuhi nga gitisok mo sa akong sabakan. Paglabay sa mga bulan nahimugso ang usa ka mahimsog nga batang lalake nga liwat nimo. Matod ni Mama, ang bata miliwat nimo kay dako man kuno ang akong paghigugma nimo.
Sa among kompaniya may bag-ong gidawat nga ‘accounting manager’ kay si Sir Romeo Valiente adto na motrabaho sa New Zealand isip ‘immigrant.’ Si Sir Efren Juntilla ang ngalan sa bag-ong manedyer sa among departamento. Dili kaayo siya guwapo ug hinayon nga manglihok-lihok. Ulitawo pa siya sa edad nga trayenta. Maguwang nakog tulo ka tuig. Paglabay sa tulo ka bulan nagkasuod kami. Usa ka higayon gidapit ko niya og panihapon sa ilang balay kay ika-31st birthday anniversary niya. Didto gipadayag niya ang iyang gibati kanako. Gitug-anan ko siya sa tinuod kong kahimtang nga may anak na. Ingon siya, nasayod na siya kinsa ako pinaagi kang Rizza ug Dianne. Paglabay sa usa ka bulan gisugot ko siya. ‘Whirlwind romance’ ang nahitabo kanamo.
Kaslon na kami si Efren ugma. Kon wa pa ka magluib sa atong gugma, ikaw unta ang kuyog ko paingon sa altar sa kaminyuon. Di ko kalimot nimo! Dinhi na lang kutob, Ellen.”
Gipadala ni Ellen ang iyang mensahe kang Treb pinaagi sa ‘Messenger’ sa internet. (KATAPUSAN)