DEAR Noy Kulas,
Maayong adlaw kanimo. Kining akong problema kabahin sa akong live in partner.
Duha na mi ka tuig nga nagpuyo while nag work ko diri sa Cebu. Siya usa ka ahente sa usa ka kompaniya mao nga magsige og travel. Tungod ani, nagtuo ko nga mao ni ang rason nganong tagdugay siya mauli sa among gipuy-an.
Usa ka adlaw niana, dunay babaye nga nanawag nako. Nagpaila siya nga asawa sa akong kapuyo pero di siya isog. Matod niya nga nakahibawo siya sa among relasyon sa iyang bana human niya mabasahi ang akong messages sa text ug Messenger. Wa siya masuko nako kay mas naluoy siya kay nagmata ra kuno ko og buntag nga minyo ang akong kapuyo. Wa na sab kuno siya mahibung kay ikatulo ra kuno kong kabit.
Maora ko og gitabunan sa kalibutan human ko makahibawo sa iyang background. Tulo diay ming iyang gipuyo mao nga tagdugay mouli. Usahay tagduha ka buwan siya. Wa lang ko mahibung kay iyang ahente lagi siya mao magsige og biyahe.
Noy, wa nay kabutangan sa akong kauwaw. Ako unta siyang I-confront pero di na siya ma-contact ug iya kong gi-block. Unsa kahay akong buhaton, akong adtuon ang iyang pamilya? Maayo kaha ni? Di kaha hinuon magubot? Please tambagi ko.
JADE
Jade,
Bitaw di lalim nga ikaw limbungan, labina sa tawo nga imong gisaligan sa tanan ug natingban sa pagmahal sulod sa duha ka tuig. Yes, duha ka tuig kang nagdahom nga ikaw ra ang iyang gimahal pag-ayo. Unya diay, usa ra diay ka sa tulo nga iyang gipuyo, wa pay labot sa iyang asawa.
Kon gusto ka og closure, pakigkitai ang asawa sa imong kapuyo. Mas maayo nang magkaestorya mo kon gusto ka nga tuldokan ang inyong relasyon sa iyang bana. Kay kadtong imong kapuyo mahadlok tong moatubang pa nimo,labina karon nga bag-o pa nimong nadiskobrehan ang iyang kabuang. Unya ayaw na pag-attempt sa pag-contact kaniya. Ang imong pagpakigkita sa asawa igo na nga mag-closure ka pinaagi sa pagpakigkita sa asawa. Ayaw na lang sa imong kapuyo kay basin madala ka pa unya sa atik.
Lisod ang imong journey. Makatabang kaayo nimo ang imong pamilya o bisan kinsa nga relative nga imong suod nga imong kasultihan niani. Imong mapahungaw ang kasakit nga imong gibati kay makatabang kini sa imong pag move on. Unya, pag-ampo sa Ginuo nga hatagan ka og kusog ug kalig-on ning krisis nimo karon.
NOY KULAS