FATHER’S Day na sab karong Dominggo, Hunyo 16. Kumusta ang relasyon nimo sa imong papa o sa imong anak? Nia ang sugilanon sa amahan nga gisakripisyo ang tanan lakip na ang iyang trabaho sa Cebu aron lang makauban ang iyang anak sa kaulohan. Hinaot makahatag ni og inspirasyon ug pagtulun-an. Advance Happy Father’s Day, Ssssuper Ka!
Papa Nitoy ug John Roa
Kada-mopagikan sila sa ilang bugtong anak nga si John Roa paingon sa Manila kanunay mobaha ang luha sa iyang Papa Nitoy nga maoy mas emosyonal kaysa iyang misis.
Bata pa lang si John ambisyon na gyud niyang mag-singer hangtod nga nakadesisyon ning manimpad sa Manila sa edad nga 16 bisan pa man kon supak ang iyang mga ginikanan.
Si John ang bunga sa batan-ong pagminahalay sa iyang mama ug papa nga nagsugod sa kasikatan niadto ni Nitoy isip dancer-choreographer sa grupong “Simple Guys.”
Ang ilang childhood romance ang usa sa mga na-featured usab niadto sa ABS-CBN’s drama anthology “Maalaala Mo Kaya.”
Si Joy 13 anyos lang samtang ang iyang papa 15 dihang nagkauyab sila. Namabdos si Joy ni John sa edad nga 17 niadtong 1999 ug nagpakasal sila ni Nitoy pagkasunod tuig niana.
Nagpuyo sila sa Mabolo apan niadtong Enero 2018 nibalhin sila sa Manila aron dili na mag-ngadto-ngari ang ilang musikerong anak.
“Sa una pa namo gusto ubanan si John katong ni-decide siya mo-stay for good sa Manila aron ma-guide namo siya, labi na kadtong busy na siya sa iyang career kay daghan na siya og gigs ug TV guestings,” matod ni papa Nitoy.
“Mohilak gyud ko kada-larga niya sa Manila. Super close grabe. Maora mi og bestfriend. Kay only child man gud. Sakit malayo namo.”
Bisan 19 anyos na karon si John, usa sa mga paborito gihapon nilang bonding moment ang motan-aw og mga kabuang ug kataw-anan nga videos.
“My Papa is the best father gyud. Para lang kaming magkapatid. Very supportive to the extent nga gi-sacrifice nila ang ilang work sa Cebu para lang nako,” paambit ni John.
“Wa sad koy ikasaway sa akong anak kay he’s very sweet, caring, buotan, ug very generous.”
Niangkon ang amahan ug anak nga dili perfect ang ilang relasyon ug dili kalikayan nga magkasumpaki sad sila.
“Ang nakanindot ni John kay siya ang bata nga kamao jud mag-sorry. Forgiveness mao nay pinaka-importante. Dili namo dugayon among kahiubos sa usag usa. Ako mangayo pud og pasaylo niya,” dason ni Nitoy nga nagtrabaho na karon sa Manila isip Zumba instructor ug duna sad silay food business.
“Magsinabtanay, gugma, magpinasayloay unya pirme nako siya i-treat nga maora jud og amigo ra mi para dili sya mauwaw mag-open up sa iyang mga problema.”
Wa sad makawang ang ilang mga sakripisyo kay si John Roa usa na karon sa mga nagkasikat nga singer-songwriter sa Manila diin lakip sa iyang nakatrabaho ang mga Kapamilya stars sama ni Yeng Constantino ug Sarah Geronimo. Nag-duet sad sila ni Janine Berdin sa It’s Showtime sa miaging semana.
Lakip sa umaabot nga shows ni John ang concert nila ni Nadine Lustre, Karencitta ug Sam Concepcion sa MOA Arena sa July 21 ug ang upcoming launch sa bag-o niyang kanta “Amgo.” Si John mahinumdoman sa iyang kantang “Oks Lang Ako” ug “Hindi ako F*ckboy” nga nag-viral sa YouTube.
“Karong Father’s Day mangaon og lami. Mag-celebrate kauban ang papa sa akong wife kay naa man sad sa Manila akong father-in-law. Life is short, let’s be happy,” dugang pa ni Papa Nitoy.