KADUDAHAN pa kon makaduwa ba ang Fil-Am guard nga si Jordan Clarkson sa Gilas Pilipinas sa umaabot nga FIBA World Cup nga ipahigayon sa China karong Agusto 31 ngadto na sa Septiyembre 15.
Kini tungod kay ang status ni Clarkson, sakop sa Cleveland Cavaliers, isip usa ka Filipino gibase sa Fiba nga usa ka naturalized citizen.
Ubos sa Fiba rules, ang national team gitugotan lang nga makakuha og usa ka naturalized citizen ug sa kaso sa Pilipinas si Andray Blatche maoy gihatagan og prayoridad sa Samahan Ng Basketbol sa Pilipinas (SBP).
Gitinguha karon sa SBP nga si Clarkson maisip nga usa ka local player sanglit aduna man kini dugo nga Pinoy.
Apan hugot nga miinsister ang Fiba nga ang kapakyas ni Clarkson sa pagkuha og Philippine passport sa wala pa siya mag-edad og 16 anyos maoy rason nga dili gyud siya makonsiderar nga local player.
Kini base ra usab sa patakaran nga gisunod sa lega.
Si Sonny Barrios, usa sa top officials sa SBP, mipasabot nga kon madugangan ang eligibility rule sa Fiba diin tugotan ang player sa pagsumiter sa DNA test, hayan mo-qualify si Clarkson sa 2023 World Cup nga ipahigayon dinhi sa nasod.
Sa Australia Boomers, ang NBA center nga si Thon Maker sa South Sudan gitugotan nga mamahimo nilang local player tungod kay nagpuyo man kini sa Perth, Australia niadtong singko anyos pa siya.
Ingon ni Barrios nga ang dungan nga presensiya unta ni Clarkson ug Blatche sulod sa korte makahatag unta og saktong kombati sa Pilipinas. (JBM)