NAGPATONG-PATONG ang kaso nga atubangon sa 10-wheeler truck driver nga si Joel Sinampay Aras, 36-anyos, taga Camaman-an, Cagayan de Oro City human sa mangilngig nga disgrasya sa kadalanan, buntag sa Hunyo 11 didto sa Crossing, Barangay Matina Pangi, Davao City.
Kasong reckless imprudence resulting to multiple homicide with double serious physical injuries and damage to property ang atubangong kaso ni Aras ngadto sa korte.
Sumala ni Police Major Ronald Lao, hepe sa Talomo Police Station, nga ilaha nang giandam ang kaso batok sa suspek ug nakatakda karong adlawa ang pag-inquest niini sa City Prosecutor’s Office (CPO).
Subay sa inisyal nga imbestigasyon sa traffic section sa Talomo Police Station, nasayran nga kusog ang dagan sa 10-wheeler truck nga dunay kargang mga sinako nga bugas nga midaro sa mga sakyanan nga kasugat niini.
Giingon sa drayber sa 10-wheeler truck nga dihang anaa pa siya sa atubangan sa usa ka gasolinahan sa Carlos P. Garcia Highway, nawad-an na og brake ang iyang gimaneho nga midaro sa laing walo ka mga sakyanan.
Ang mga nangamatay mao sila Jhonny Ustan, Renato Lozada, mag-inahang Emelyn Viernes ug Kylie Viernes, 3-anyos, usa ka madre nga si Sister Carmen Remoraza Saniel, 62-anyos, Virjiher Cabalo Sangco, Jose Sayman Manaytay, Hernie Bastatas ug Vicente Cedeno, ang drayber sa L300 van.
Samtang ang naa sa ospital mao sila Danny San Jose ug Leonardo Sagillo.
Kasamtangan, gibalhog ang suspek sa selda sa Talomo PNP kinsa naghulat sa mando sa korte labot sa iyang kaso.
Gidid-an una sa kapulisan nga maatubang sa mga kabanay sa mga biktima ang drayber sa 10-wheeler truck aron malikayan ang tensyon batok sa mga paryente nga perteng sukoa ngadto sa suspek.