Barrita: Kiha nga rape batok sa bana

DUNAY nangutana kon unsa ang unang giawayan ni Adan ug ni Eba didto sa paraiso. Usa sa mga tubag nag-ingon nga nahitabo kini sa dihang gustong makigdug si Adan apan nibalibad si Eba kay naglabad ang iyang ulo.

Mao na nga dihay usa ka bana nipauli nga nagdala og paracetamol kay ipatomar sa iyang asawa. Matod pa sa asawa, “Love, nganong patumaron man kon nimo ana nga wa man maglabad ang akong ulo?” Nipahiyom ang bana nga niingon, “Kon mao na, magdug ta.”

Apan ang pangutana, mahimo bang mokiha og rape ang usa ka asawa batok sa iyang bana kon pugson siya sa pakighilawas?

Mahimo, sumala pa sa Republic Act No. 9346, ang Anti-Rape Law of 1997, nga nag-amendar sa Revised Penal Code. Kini tungod sa paghisgot sa maong balaod niining maong mga pulong, “in case it is the legal husband who is the offender.”

Ang Article 266-C, Revised Penal Code, nagkanayon. “Effect of Pardon. - The subsequent valid marriage between the offended party shall extinguish the criminal action or the penalty imposed. In case it is the legal husband who is the offender, the subsequent forgiveness by the wife as the offended party shall extinguish the criminal action or the penalty: Provided, That the crime shall not be extinguished or the penalty shall not be abated if the marriage is void ab initio.”

Kon ang biktima sa pagpanglugos makigminyo sa nanglugos kaniya, mapapas ang krimen nga rape. Kon gibista pa ang kaso, ibasura kini. Kon nakonbikto na, mawagtang ang silot nga gipahamtang.

Samtang kon ang nanglugos mao ang legal nga bana sa biktima, mapapas ang krimen kon pasayluon siya sa iyang asawa. Apan kinahanglan nga balido ang kaminyuon ug di kadtong gitawag nga kaminyuon nga void ab initio o di balido gikan sa sinugdan.

Sa kaso nga People of the Philippines versus Edgar Jumawan (G.R. No. 187495 April 21, 2014), ang Korte Suprema niingon, “Husbands do not have property rights over their wives’ bodies. Sexual intercourse, albeit within the realm of marriage, if not consensual, is rape.” Ang pakighilawas, bisan pa sa sud sa kaminyuon, kon supak sa kabubut-on, usa ka pagpanglugos.

Adunay pahimangno ang Korte Suprema ngadto sa mga bana. “Husbands are once again reminded that marriage is not a license to forcibly rape their wives. A husband does not own his wife’s body by reason of marriage. By marrying, she does not divest herself of the human right to an exclusive autonomy over her own body and thus, she can lawfully opt to give or withhold her consent to marital coitus.”

Ang usa ka bana, matod pa sa Labawng hukmanan, nga naagrabyado sa kanunay nga pagdumili sa iyang asawa nga makighilawas di mahimong modangop sa kusog aron matuman ang iyang gusto. Apan mahimo siyang modangop sa mga Family Courts aron mahibaw-an kon ang maong pagdumili usa ba ka psychological incapacity nga maoy basihan sa pag-anular sa kaminyuon. - edbarrita@gmail.com

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph