KARONG adlawa ang deadline sa pagsumiter sa mga midaog o pilderong mga kandidato sa ilang Statement of Contributions and Expenditures (Soce) niadtong miaging Mayo 13 nga eleksiyon. Ang pagsumiter sa Soce sa mga kandidato nalatid sa Republic Act 7165 of 1991 nga naglatid sa synchronized national and local elections and electoral reforms. Nalatid sa maong balaod nga ang mga kandidato sa pagka-presidente ug bise presidente mogasto lang og P10 matag botante ug ang ubang mga kandidato nga adunay partido, P3 matag botante. Samtang ang mga independent, P5 matag botante.
Ibutang usab kon pila ang nadawat nga contribution og diin gikan. Ang mapakyas sa pagsumiter sa ilang Soce mag-atubang og kasong kriminal o administratiba ug dili na tugutan nga makapapili og balik samtang ang mga nidaog dili maka-asumir sa ilang puwesto. Pero ang pangutana, kon tarung bang mideklarar ang mga pulitiko sa ilang Soce ngadto sa Comelec? Sama aning usa ka midaog nga Provincial Board member nga sakop sa usa ka partido. Sa iyang Soce nga gisubmiter sa Comelec provincial office, migasto lang siya og P20,000 panahon sa kampanya. Kay matod pa niya nga misuweldo lang siya og duha ka campaigners ug ang uban iyang gi-imprinta og mga campaign materials. Motuo kaha mo ani? Wala ra na sa panggasolina. Pagkadako sa iyang distrito, naa pay mga isla unya mao ra ang iyang nagasto? Binoang man ning dako.
Wala siya mohatag og gamay nga hinabang sa mga mayor ug ubang mga pulitiko nga milansar usab sa iyang distrito nga midala sa ilang pangalan. Ug mao ra ni iyang gasto, morag makapadasig man sab ni. Unya dili ni ma-verify sa taga Comelec kon tinuod ba ni? Maayo ning maong pulitiko kay dili sama sa uban nga namalit og boto.
Maayo pay wagtangon na lang ning maong balaod kay inutil ning dako. Hinuon, aduna man say mga pulitiko nga natangtang gumikan kay overspending. Pero kon gamay lang ang gasto, way problema. Pero klarong namakak ang mga pulitiko. (bobbygnalzaro@gmail.com)