KON subsob karon si Presidente Rodrigo Duterte sa iyang paggukod niining Kapa, usa ka independent religious corporation, nga giingon nag-operate og pinakadakong investment scam sa kasaysayan sa nasod, way rason kon nganong dili usab kini niya buhaton ngadto sa usa ka dakong ahensiya sa gobiyerno nga nakamugna usab og dakong anomaliya o scam kalabot sa pundo nga gikan mismo sa buhis sa mga tawo.
Nadiskobrehan karon nga moabot ngadto sa binilyon ka pesos nga salapi sa Philippine Health Insurance Corp. (PhilHealth) ang nasakiyo sa mga kurakot nga mga opisyal pinaagi sa pagpanglimbong ug pagpresentar og bogus nga mga dokumento.
Tiaw mo bay sukad niadtong 2013 moabot na ngadto sa P154 bilyones nga gipaagi kunohay og bayad ngadto sa mga tambalanan ang nawala sa PhilHealth.
Apan nasuta nga gawas sa pipila ka mga bayranan ang gipabukad og maayo, aduna usay mga ghost dialysis treatments, ghost patients ug mga peke nga mga miyembro ang gipalusot didto sa ahensiya.
Usa ka whistleblower nga kanhi empleyado sa WellMed Dialysis Center didto sa Kaulohan ang mipiya-it sa maong modus. Matod niya nga ang nahisgutang kompaniya mi-file og applications alang sa PhilHealth claims sa mga “ghost dialysis” sa mga pasiyente nga hagbay rang nangamatay kansang mga pirma gipangsundog lang.
Duna usay mibutyag nga sa niaging tuig ang PhilHealth mibayad og P11 billion sa pipila ka mga hospital alang niadtong mga nasakit sa pneumonia, apan nasuta sa Department of Health nga walay pneumonia outbreak nga nahitabo.
Kining tanan nga nahisgutan sa unahan dili matigayon ug walay binuang mga makalusot kon walay mga insiders sa PhilHealth nga nakigkumboya sa mga pribadong tambalanan.
Sa ato pa, tataw ug klaro nga dunay mafia sa PhilHealth.