MAKITA na karon ang kalambuan sa pagtukod sa 8.5 kilometros nga Cebu-Cordova Link Expressway (CCLEX), labina na niadtong moagi sa Cebu South Coastal Road viaduct.
Kini human makompleto ang tanang board piles alang sa ganton kun pylon sa main bridge.
Hapit na mahuman ang pagbubo sa kongkreto sa pile caps sa duha ka mga tower tali sa Mactan Channel, diin human niini, mosunod ang self-climbing formworks alang sa pagtukod sa duha ka mga tower.
Nahuman na usab ang estaka kun piling sa support anchors sa main bridge.
Gitrabaho ang estaka gikan sa baybayon padulong sa dagat alang sa Cordova viaduct gikan sa temporaryong causeway samtang magpadayon ang pagtukod sa column sa rampa ug pier.
Nagpadayon usab ang embankment work alang sa permanenteng causeway.
Sa labing uwahi nga ihap, mokabat sa 1,519 ka personnel ang nagtrabaho sa CCLEX project.
“We are delighted to give this update that we have hurdled this major milestone of completing the piling works for the pylons of the main bridge and almost done with the large concrete pouring for the pile caps. We are working hand in hand with our team to complete the works on the other components of the project and be able to deliver the CCLEX, as committed, in 2021,” matod ni Cebu Cordova Link Expressway Corporation (CCLEC) president ug general manager Allan Alfon.
Ang P30 bilyunes nga CCLEX project dunay tagduha ka mga lane matag direksyon.
Makaagi ra ang dagkong mga barko ilawom sa taytayan base sa katas-on ug kahubugon niini.
Gipaabot nga moabot og 50,000 ka mga sakyanan ang moagi sa taytayan matag adlaw.
Mag-feature ang taytayan og krus nga magsiga nga magsimbolo sa papel sa Sugbo isip dapit diin magsugod ang Kristiyanismo sa nasod. (REV)