KON kaniadto ang mga pulis mosakay diha sa mga pampubliko nga sakyanan sa di pa kini molarga sa mga bus ug PUJ terminal, sugod sa Miyerkules sa buntag, Hunyo 12, gihimo na sa Mandaue City Police Office ang pagsakay samtang nagdagan ug nagsubay sa kadalanan ang mga PUV.
Kini ang gitawag og Police on-Board Upgraded sa MCPO.
Mas kampante pa unya ang mga pasahero nga maggikan sa mga terminal o magsakay sa mga bus ug public utility jeepney sa kadalanan sa dakbayan sa Mandaue niini.
Mga pulis random nga mosakay sa mga bus o PUV.
Hinuon pipila lang ka metro ang gilay-on ang sakyan sa mga pulis sa nagkadaiya nga estasyon sa MCPO.
Giklaro sa mga pulis nga di libre ang ilang pagsakay kay moplete usab sila og insakto ngadto sa mga driver.
Usa kini sa paagi nga nakita nila nga mas epektibo nga mapadangat ang mga impormasyon kalabot sa paglikay nga mabiktima sa bisan unsa nga kremin sa sakyanan.
Sa miaging tuig gilusad na sa MCPO ang “pulis sa jeep’, apan naputol kini tungod sa sunod-sunod nga dagko nga kalihukan sugod sa Semana Santa, National Youth Day ug hangtod na sa piniliay.
Ning nagbukas na usab ang mga klase, mas gihingusgan pa nila ang kampanya batok sa kriminalidad.
Ila usab kining himuon sa kagabhion, diin unipormadong mga pulis mopasidaan ug manghatag og flyers sa mga safety tips.
Lakip na sa gipahinumdom ang paglikay nga mabiktima sa human trafficking.
Gilusad kini dungan sa pagsaulog sa Adlaw Kaugalingnan, Miyerkules, Hunyo 12.
Human sa ilang pagsaulog sa matag estasyon, direkta na ang mga mga pulis sa ilang mga assigned nga lugar diin sila mosakay sa mga pampubliko nga sakyanan.
Matod ni Police Corporal Marriane Sumarago, police community relations officer, sa Subangdaku Police Station, nga usa ni sa pahinumdom sa publiko nga makatarunganon ra usab nga gawasnon ang tanan sa bisan unsa nga klase sa kremin.
“Mosakay na gyud mi nga bisan nagdagan ang jeep ug bus aron sad dili mahasol ang mga driver, dual purpose nani, para dugang security sa mga pasahero ug para sad mapasidan-an pa kadtong mga pasahero nga didto pa sa unahan nisakay, nga wala makadungog sa mga angay buhaton paglikay sa mga posibleng mobiktima kanila. Kay walay mamiktima kon dili sad sila makakita og prospect nga biktimahon,” saysay ni Sumarago sa Superbalita Cebu.