KAPIN P21.6 bilyones ang kantidad sa real properties sa Kapitolyo maoy i-turn over sa Davide administration ngadto sa umaabot nga pamunuan ni governor-elect Gwendolyn Garcia.
Si Hilario Davide III maoy outgoing governor apan siya usab ang incoming vice governor sa lalawigan sa Sugbo.
Ang Provincial General Services Office (PGSO) nahuman na sa pag-imbentaryo sa tanang mga kabutangan sa Kapitolyo as of December 31, 2018, nga kabahin sa pagpangandam sa Local Governance Transition Team alang sa turnover.
Matod sa hepe sa PGSO, Jone Sepe, nga sa mga property sa Kapitolyo, ang mga yuta maoy labing dako ug balor.
Moabot sa P21,633,168,792.75 ang kinatibuk-ang kantidad sa mga luna nga gipang-iya sa provincial government, nga anaa usab sa nagkadaiyang dapit sa Sugbo.
Sigun ni Sepe, lakip sa mga luna sa Kapitolyo ang Capitol compound, Sudlon lots sa Lahug, Balili Property sa siyudad sa Naga, 93-1 lots sa Cebu City, airstrip sa Bantayan, Centcom lots ug uban pa.
“Apil sa DILG transition documents gipangayo para sa new administration kanang inventory sa tanang yuta, kanang mga properties nato, as of December 31, 2018,” niingon si Sepe.
Sa laing bahin, moabot sa P344.2 million ang nahibilin sa aktwal nga kita sa kagamhanan sa lalawigan sa unang quarter karong tuiga base sa 2019 annual budget. Kini base usab sa financial statement gikan sa Provincial Accounting Office.
Matod ni Provincial Accountant Marieto Ipil, nahikay na niya ang maong dokumento kay lakip man kini sa gikinahanglan alang sa turnover ngadto sa bag-ong administrasyon.
Gipasabot niya, nga ang iyang opisina maoy mo-atiman sa mga pagpagawas ug pondo alang sa mga expenses, base usab sa actual income nga nisulod sa panudlanan sa Kapitolyo.
Sa general fund dunay nisulod nga P1.2 billion samtang sa Special Education Fund may nisulod nga P53.6 million. May nagasto hinuon nga 861 million gikan sa general fund ug p10.5 million gikan sa SEF sa unang tulo ka buwan.
Sigun ni Ipil, nag-una sa mga gigastuhan mao ang sweldo sa mga kawani sa provincial government, maintenance and other operating expenses, bayad sa mga kontraktor ubos sa capital outlay ug uban pa.
Sa pagka-karon, ang total balance gikan Enero 1 hangtud Marso 31 karong tuiga anaa sa P344,205,879.29, diin ang kita nga niadto sa general fund anaa sa P301,011,156.07 ug P43,194,723,22 ang napunta sa SEF.
“Sa libro (book of entries) na gud, manifested man gud siya as expenditures- expended amount out of the total income,” pasabot ni Ipil sa Superbalita.