GIBUTYAG ni Police Colonel Limeul Obon, direktor sa Lapu-Lapu City Police Office (LCPO), nga moabot sa 23 ka mga tawo ang mabahinan sa P1 million reward money sa kagamhanan sa dakbayan sa Lapu-Lapu nga gitaganan alang sa nakasulbad sa kaso ng pagpatay sa dalagitang si Christne Lee Silawan.
Sa 23 ka mga tawo, lima ang priority nga matagaan gumikan sa ka-vital sa ilang mga impormasyon sa pagtumbok sa akusadong si Renato Llenes nga nipatay ni Lee.
Samtang,ang nahabilin pulos lang supporting informant makadawat gihapon gumikan sa ilang natabang sa imbestigasyon sa kapulisan.
Wala pa hinuon pormal nga nagkaestorya si Obon ug si outgoing Lapu-Lapu City Mayor Paz Radaza kalabot sa paghatag na sa reward apan ang mayor una nang nibutyag nga sunod semana posibleng iya nang ihatag sa kapulisan ang reward money ug sila na ang bahala sa pagbahin niini sa ilang mga impormante.
“Depende sa ilang contributions mag meeting pami sa akoang investigators para ma final” matod ni Obon dihang gipangutana pila ang bahin nga salapi sa matag usa.
Samtang gibutyag ni Obon nga nasuprisa usab siya sa kalit nga pag-plead not guilty ni Llenes sa kasong murder nga iyang giatubang kalabot sa kamatayon sa dalagitang si Silawan atol sa arraignment niini sa miaging semana.
Apan nakasabot ra usab si Obon sa estratehiya sa abogado ni Llenes hinungdan sa pag-plead not guilty niini.
Bisan pa niini, masaligon gihapon si Obon nga mapamatud-an nila sa hukmanan nga kasong murder ang nabuhat ni Llenes base sa mga ebidensyang ilang gihuptan ug dili homicide nga mao untay gusto sa abogado niini.
Kahinumdoman, ang kaso sa pagpatay ni Lee nahimong kontrobersiyal human ang National Bureau of Investigation (NBI) 7 maoy unang nipresentar nga ilang nadakpan ang suspek nga usa ka menor de edad.
Apan wala magdugay, nitumaw ang kalibog sa katawhan human ang kapulisan sa Lapu-Lapu nipresentar sa laing suspek nga niangkon atubangan sa media sa salaud nga gibuhat nga mao si Llenes.
Giingong nagbasol siya sa nabuhat hinungdan nga 'nitahan' sa awtoridad ug andam moatubang sa silot.
Tungod sa direktang pag-angkon ni Llenes, ang piskaliya nihukom nga mao kini ang suspek sa kaso ug gipabuhian ang menor de edad nga suspek. (GCM)