BAYANI nga mga Bisaya gipasidunggan sa Kalihim sa Edukasyon, Leonor Briones, sa iyang pakigpulong atol sa paghandum sa ika-121 nga anibersaryo sa Adlaw sa Kaugalingnan sa nasud, kagahapon, Hunyo 12.
Samtang si outgoing Lapu-Lapu City Mayor Paz Radaza sa iyang bahin mihulagway nga ang katawhan nagsilbing modernong bayani, ilabi na ni Presidente Rodrigo Duterte nga nakigbatok niadtong na-ulipon sa ginadiling drugas, kalisod ug abuso.
Ang dakbayan sa Lapu-Lapu ilabi na ang Liberty Shrine, Barangay Mactan nagsilbing sentro sa maong selebrasyon sa nagkaduol nga paghandum sa ika-500 nga tuig sa Kadaugan sa Mactan sa tuig 2021.
Si Briones nga usa ka Negrense (lumad nga taga-Negros Oriental) gamit ang pinulongang Binisaya gitagsa-tagsa ni Briones sa paghisgot ang mga Bisaya nga bayani kansang mga tinguha susama kang Datu Lapu-Lapu.
Iya sab nga gipahibawo ngadto sa 5,000 ka mga kawani sa kagamhanan nga mitambong sa naasoyng okasyon nga ang Independence Movement dili lang sa kaulohan nagsugod.
Ilabi na anga way dapit sa Visayas ug Mindanao nga nalakip sa eight rays of the sun diha sa bandila nga nagrepresentar sa walo ka lalawigan nga nagrebulosyon batok sa mananakop.
Ang maong lalawigan naglangkob lang sa Bulacan, Pampanga, Nueva Ecija, Tarlac, Laguna, Cavite, Batangas ug Metro Manila.
“Kitang mga Bisoy (Bisayang Tisoy) ug Bisdak (Bisayang Dako) wa nato kalimti nga kita apil pud ta sa rebolusyon, apil pud ta sa war of independence, apil pud ta sa pagsukol sa banyagang nasud nga gustong mosakop kanato,” tipik sa speech ni Briones.
Mipasalamatan sa opisyal si Presidente Rodrigo Duterte nga mihatag og igong pasidungog ni Lapu-Lapu.
“Nalipay kaayo ang mga Bisdak sa Visayas ug Mindanao ug tibuok nasud nga gideklarar sa presidente ang chieftain sa Mactan nga si Lapu-Lapu.
“Dili lang siya isda, tinola, sinugba, pero girecognize siya nga first hero nga nag-resist sa Spanish colonization,” saysay ni Briones.
Apan wa mag-inusara si Lapu-Lapu sa iyang kawsa kay misunod ang mga Bisayang Bayani nangulo sa rebolusyon sama nalang nila ni: Pantaleon “Leon Kilat” Villega, Arcadio Maxilom, Juan Climaco, Francisco Llamas, Luis Flores, Gat Tamblot, ug Fracisco “Dagohoy” Sendrijas.
Susamang kalambuan si Mayor Radaza nipaambit nga pinaagi sa liderato sa presidente inabagan sa uniform men and women sa kapulisan ug militar lakip na ang government workers ang nakigbatok aron makab-ot ang kalinaw ug matunol ang kaayuhan sa matag Filipino.
“As we commemorate this great independence, we are called to ignite the bravery in us, to continue to fight for liberation against forces and other social issues, for the future generations to celebrate,” tipik sa pakigpulong sa mayor atol sa programa sa Adlaw sa Kagawasan sa City Hall. (FVQ)