NISUPORTA si Police Brigadier General Debold Sinas sa hukom ni Police Colonel Royina Garma, hepe sa Cebu City Police Office, pagparelibo sa tanang mga sakop sa Drug Enforcement Unit sa 11 ka police stations sa Siyudad sa Sugbo.
Matod ni Sinas nga bisan adunay mga pulis nga nagtinarong sa ilang trabaho ug pipila lang ang nagbinoang sama ni Police Corporal Rogelio Atillo, kinanglan sila hutdon sa pagtangtang.
Iyang giangkon nga wa sila masayod kon usa lang ba ang nalambigit sa pag-recycle sa ilang nasakmit nga illegal nga drugas sa matag anti drug operation. “Naa siguroy uban diha nga wala namo namatikdan. So, sweeping nalang. All of them gi undergo nag drug test,” matod ni Sinas.
Gisurpresa ni Garma pag inspection ang tanang locker sa kapin 50 ka personnel sa DEU, lakip na ang naa sa kampo sa CCPO aron masusi aduna bay gitago nga shabu. Human sila pahulipi angayan sila nga ipaubos sa stress debriefing samtang nangita pa ang CCPO og ikapuli kanila. (AYB)