KON usa ka sa naingganyo sa hybrid buses nga ni-leak sa social media, ayaw kalabaka, kay adunay daghang moabot niini sa Sugbo.
Gipahibaw sa Land Transportation Franchising and Regulatory Board (LTFRB) 7 nga kining mga hybrid bus parte kini sa Public Utility Vehicle Modenization Program sa Department of Transportation (DOTr).
Matod ni LTFRB 7 Regional Director Eduardo Montealto Jr., nga sa pagkakaron, unom pa lang ka mga hybrid bus ang nagdagan sa Sugbo diin ang biyahe anaa sa Dakbayan sa Sugbo o sa Cebu South Bus Terminal paingon sa Dakbayan sa Lapu-Lapu.
Lahi sa naandan nga bus, kining mga hybrid bus adunay kaugalingon nga pansayan ug mas dako ang leg room niini kun mas luag.
Gipasabot ni Montealto nga kinahanglan nga makompleto sa Vallacar Transit ang pagpadagan sa ilang 110 ka hybrid bus sulod sa siyam ka mga buwan.
Sa 110 ka hybrid bus, 20 niini ang modagan gikan sa Cebu City paingon sa Lapu-Lapu City samtang 45 paingon sa Carcar ug laing 45 paingon sa dakbayan sa Danao.
Anaa sa P310 ang plete gikan sa dakbayan sa Sugbo paingon sa Danao City samtang P300 ang gikan sa Cebu City paingon sa Carcar City.
Gibutyag usab ni Montealto nga andam na ang mga unit sa head office sa Vallacar sa Bacolod apan ila pang gipaubos sa finishing touches.
Gikan sa China ang maong mga bus.
Nadawat sa Vallacar ang ilang provisional authority niadtong Mayo 29.
Ang maong mga bus kinahanglan usab mosubay sa point-to-point nga sistema ug d pwede nga mohunong lang bisan asa.
Gawas sa hamugaway ug komportable kini, di usab kini matawag nga kompetinsya sa kasamtangan nga mga nagbiyahe nga bus tungod kay mas mahal kini.