SECTIONS
Thursday, June 27, 2019
SUPERBALITA CEBU

Kabtangan sa Kapa gipugngan

ANG Court of Appeals niisyu og freeze order kun nipugong sa daghang banks accounts ug ubang assets nga gilambigit sa Kapa-Community Ministry International, Inc. (KAPA).

Ang mando sa korte gipaabot nga dunay epekto sa pagpanghatag sa “ginansya” nga mas gitawag sa Kapa og “love gift” nga 30 porsyento nga return sa “donasyon.”

Kini samtang dunay 12 ka samang investment scheme nga gipanid-an ang kapulisan dinhi sa rehiyon 7. Usa niini gitumbok nga naa sa Sugbo.

Sa ilang press statement, ang Securities and Exchange Commission (SEC) nipahibawo nga ang korte niluwat sa freeze order niadtong Hunyo 4 tungod sa petisyon sa commission ug Anti-Money Laundering Council (AMLC).

Ubos sa Section 10 sa Republic Act No. 9160, kun Anti-Money Laundering Act of 2001, nga giamendhan, ang Court of Appeals mahimong moluwat og freeze order base sa verified ex parte petition sa AMLC.

Kini human usab masuta nga dunay probable cause nga ang monetary instrument o kabtangan nalambigit sa ilegal nga kalihukan.

Lakip sa ilegal nga mga operasyon ubos sa anti-money laundering law mao ang mga buhat sa pagpanglimbong ug uban pang mga kalapasan ubos sa Republic Act No. 8799, kun Securities Regulation Code.

‘Ponzi Scheme’

Gi-revoke sa SEC ang certificate of incorporation sa Kapa tungod sa giingong pagpanglimbong nga giingong nakadaut kaayo sa publiko.

Ilang nakaplagan ang Kapa nga nangrekrut ug nangdani sa mga sakop sa pag “donate” og bisan pila bugti sa 30 porsyento nga “love gift” sa tibuok kinabuhi.

Ang miyembro way buhaton bisan unsa, gawas sa pag-invest ug maghuwat sa payout.

Matod sa SEC nga kini nga buhat pagbaligya ug pagtanyag og securities, pinaagi sa investment contracts.

Ingon sa commission nga nagkinahanglan kini og ikaduhang lisensya.

Gihulagway sa SEC ang gibuhat sa Kapa nga usa ka Ponzi scheme. Ang Ponzi scheme usa ka investment program nga nagtanyag og taas kaayo nga returns kun ginansya ngadto sa investors.

Ang tubo diay gikuha gikan sa capital sa uwahi o nagsunod nga investors.

Kon wa nay mo-invest, dinhi na magsugod sa pagkatumba ang kompaniya kay wa nay mapatuyok nga kwarta.

Ayaw pagdali

Hepe sa Criminal Investigation and Detection Group (CIDG 7) miawhag sa publiko nga di dayon motuo sa mga investment nga nagtanyag og dakong kantidad nga mobalik ang kwarta kanila kay ilad kini ug di magdali sa ilang pagpadatu.

Nabantayan sa kadagkoan sa kapulisan sa Central Visayas may labot sa reaksyon sa publiko sa social media nga gibasol pa nila ang kapulisan sa dihang gipangronda ang mga buhatan sa Kapa Ministry Community International ug Organico Agribusiness Ventures.

Matod ni Police Colonel Lito Patay, hepe sa CIDG 7, nga kasagaran sa mga tawo gitan-aw lang ang naka payout.

Kon badlungon nga na gani, ang nagbadlong ang dautan.

Wa na nila huna-hunaa kon tinuod ba nga nilambo ang ilang kwarta o binoang diin ang ilang kaugalingong kwarta lang ang gipatuyok.

“Ang uban man gud tan-awon lang nila kon naay nag-payout. Okay ra nila masuko na og badlongon, kita pay kontrabida. Di nila tan- awon kon tinuod ba ni siya nga negosyo ug naa bay ingon ani nga negosyo, di ba ni kalokohan? Syempre sayon ra kayo way gihimo. Dawat ra og kwarta,” matod ni Patay.

Matod niya nga sakto ang pamahayag ni Presidente Rodrigo Duterte nga way bisan usa ka dako nga negosyo sa tibuok kalibutan nga mohatag og taas nga porsiento sa gustong mo invest.

Ang gihimo karon sa gobyerno mao ang paghatag og proteksyon sa publiko ug di modako ang problema.

“Dili gyud magpailad kay imbes nga gusto tang mahabwa sa kalisod, mosamot na hinuon ta og kapait inig buto ani,” nagkanayon si Patay.

Gibantayan

Gawas sa Organico, Kapa ug Ada Farm Agri Ventures nga nalutsan og search warrant nga giluwatan sa korte sa kaulohan, aduna pay laing investment company sa Central Visayas nga wa tugoti sa SEC nga ilang isunod kon aduna nay kamandoan sa korte.

Moabot og 12 ang mao nga mga kompaniya, usa niini naa sa Sugbo. Ila pa kining gipanid-an sa pagkakaron.

Samtang wa una ablihi sa kapulisan sa lungsod sa Compostela ang vault nga gituohan nga maoy gisudlan sa kwarta sa mga tawo nga mi donate sa Kapa.

Ang vault kasamtangan nga gikustodiya sa kapulisan sanglit apil sa mga ebidensya nga ilang gihuptan labot sa kaso nga giatubang sa grupo.

Matod ni Police Regional Office (PRO) 7 Director Brigadier General Debold Sinas nga ila pa una nga gipaabot kon kinsa ang moangkon nga tag-iya niini ug mohatag sa gikinahanglang mga ebidensya.

“Wala pa gihulat pa namo kon kinsa moadto sa Compostela police station. Establish first your identity especially usa sa mga motive namo nga gitan-aw namo is inside job. And we’re still looking for the so called branch manager nga si Christopher Abad. So, wala pa sya nagpakita. Pag moabot, ma indepth ang interview,” sigun ni Sinas. (AYB, REV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph