MOABOT ngadto sa 22 porsiyento ang pagsaka sa koleksyon sa Provincial Health Insurance Office (PHIO) tuig 2019 kon itandi sa milabay’ng 2018.
Gibutyag ni Thelma Aziz, personahe sa PHIO, nga ang ilang buhatan maoy gitahasan ug gimando nga maoy mag monitor sa mga PhilHealth claims reimbursement ug PhilHealth collection sa walo ka mga provincial hospital sa Misamis Oriental gikan sa lungsod sa Magsaysay, Gingoog, Talisayan, Claveria, Overseas Workers Welfare Administration Alubijid, Manticao, ug Initao.
Sa uwahing report niini diha sa pagpakayab sa nasudnong bandila sa Kapitolyo Probinsyal nga basi sa hospital report kalabot sa kinatibuk-an nga koleksyon sa walo ka provincial hospital sa probinsya, miabot ngadto sa P78, 961,915 gikan sa 9,743 ka claims nga nabayran ug P52,105,809 alang sa hospital charges nga gideposito sa general fund.
Ang kantidad nga P26,856,106 maoy kinatibuk-an nga koleksyon sa professional fee nga gedeposito sab sa trust fund ug subay niini adunay average value per claim nga P8,105.
Gipasabot ni Aziz nga ang Misamis Oriental Provincial Hospital sa lungsod sa Balingasag maoy adunay pinakataas nga claims payment nga P24,385,712, gisundan sa Gingoog nga adunay P17,457,824; Manticao nga adunay P13,874,040 ug pinaka-mubo nga claim payment ang lungsod sa Claveria nga adunay P3,166,270.
Dugang niini nga kon itandi niaging tuig sa bulan sa Enero ngadto Abril ang claims paid miabot lamang sa P64, 830,276 alang sa 7,363 claims paid kon asa P44,202,971 alang sa hospital charges ug P20,627,305 alang sa professional fee nga adunay average value nga P8,804.87 per claim.
“Comparatively, this year’s January to April collection represent an increase of 22 percent over the last year to January to April collection, however, a decrease of 8 percent in the average value per claim in the amount of P700 per claim is a very indicator and sign of cost effective services while at the same time maintaining the health care standards,” matud ni Aziz.