PATAY ang usa ka 64-anyos nga lola human kini nalatayan mga alas 7:10 Huwebes sa buntag, Hunyo 13, sa Zone-B, Barangay Casinglot, lungsod sa Tagoloan, Misamis Oriental.
Giila ang biktima nga si Nasy Raiz Panjay, 64, residente sa susamang dapit.
Nalatayan ang biktima sa bonggo trak nga nagdala og plaka 090103 nga nakarehistro sa ngalan ni Bernabe Paderog, taga Natumolan, susamang lungsod ug gimaneho ni Jayben Barrios Dela Cruz, 26, residente sa susamang dapit.
Sa inisyal nga imbestigasyon sa Tagoloan Police Station, nasuta nga mitabok sa pedestrian lane mismo si Panjay apan kining bonggo trak kalit mi-overtake sa unang sakyanan miresulta nga nabanggaan niini si Panjay nga mitabok sa dalan.
Giingon sab sa mga nakasaksi nga kusog og padagan ang trak bisan paman adunay pedestrian lane.
Naligsan ug naguyod ang biktima 20-metros ang kalay-on gikan sa linya ug nabangil ang dughan sa ligid. Gisuwayan pa og dala ang biktima sa St. Paul Hospital apan dead on arrival nga gideklarar ni Dr. Anna Galla.
Ang igsuon niining si Myrna Raiz nisulti nga padulong unta motambong sa patlod kay ilubong ang ig-agaw niini apan naligsan na hinuon sa trak nga kargado og trak.
Ang driver anaa na gikostudya sa kapulisan ug gipaabot lamang ang pamilya sa biktima kon mopasaka og sumbong o aduna bay settlement nga mahitabo tali sa duha.