GI-RESPETO ni Cagayan de Oro City Mayor Oscar Moreno ang gilusad karon nga signature campaign pagpalagpot kang Konsehal Zaldy Ocon tungod kay katungod kini sa katawhan isip ana sa demokrasiya nga nasud.
Kini human gilusad ang “Remove Ocon Movement” diin nanawagan sa pagpalagpot ni Ocon diha sa konseho ug nagsugod niadtong Miyerkules, Hunyo 12, nga molungtad sa Hunyo 29 aron makatigom og 50,000 ka pirma.
Nasayran nga nag-viral ang video tali nila ni Ocon ug ni kanhi mayor abogado Reuben Canoy diin makitang taas ang tingog ni Ocon ug namalikas mismo sa atubangan ni Canoy kinsa anaa sa wheelchair.
Gibutyag ni Moreno nga girespeto niini ang katawhan apan giingong duna kini proseso ug gani nasabtan niini ang tagsa-tagsa ka mga pagbati tali ni Ocon ug sa pamilyang Canoy.
“We are a democracy and everyone is free to express his or her views,” matud ni Moreno.
“That’s the prerogative of the people, we respect that but there’s a process for that,” dugang niini.
Giingong nasabtan niini ilabi na sa nahitabo ug nanghinaot nga ang kombinasiyon sa Canoy-Ocon dili mabungkag.
“Ang ako lang of course kasabot ako nga emotions are still very high with what happened last weekend so ako lang let’s just hope that cooler heads will prevail and they will be reconciled after all, like I said the Canoy-Ocon combination should not be broken,” dugang niini.
Nasayran nga wala si Ocon atol sa nahisgutang oath-taking ceremony sa mga lokal nga opisyal sa siyudad ug giingong tagaan lang una kini og panahon nga makapamalandong sa nahitabo.
Giingong wala kini gidapigan ug gani gipaminaw niini ang gipadayag ngadto kaniya human usab nibisita mismo sa iyang buhatan ang anak ni abogado Canoy nga si Rhona Canoy.