MAKASAYSAYANON ang pagpanumpa sa lokal nga opisyal sa Siyudad sa Cagayan de Oro tungod kay personal nga si Presidente Rodrigo Duterte ang nangulo sa oath-taking ceremony niadtong Miyerkules sa gabii, Hunyo 12, sa Xavier Estates Clubhouse.
Gipangulohan sa Presidente ang pagpanumpa sa mga lokal nga opisyal sa siyudad ilabi na sa lokal nga partido sa Partido Demokratiko Pilipino–Lakas ng Bayan (PDP-Laban) nga gipangulohan ni Cagayan de Oro Mayor Oscar Moreno.
Sila Konsehal Zaldy Ocon ug Konsehal Ian Mark Nacaya ang wala nakatambong sa oath taking.
Gibutyag ni Moreno nga mapasalamaton siya nga personal gyud nga mianhi si Duterte aron pag-administrar sa oath taking atol usab sa Adlaw sa Kagawasan.
Giingong daghan ang nangandoy nga mga lokal nga kagamhanan nga Presidente ang mangulo sa pagpanumpa ug mapasalamaton nga gihatagan og panahon ang siyudad bisan pa man sa kapuno sa mga iskedyul niini.
“This very special day, June 12, the President is here and we’re grateful for that although we will still go ahead with our scheduled oath taking on June 30 which is the start of our term,” matud ni Moreno.
Samtang una na usab nga nibutyag ang bag-ong nidaog sa eleksiyon nga si Konsehal Girlie Balaba nga daan na nga nag-ingon si Duterte nga mao kini ang mag-administrar ilabi na kung modaug siya isip konsehal sa dakbayan.
“This is historic for Cagayan de Oro City kasi this will be the first time for a President to swear in local elected officials outside of Malacañang, on the part of Cagayan de Oro City this will be the first time for a President mag-oath taking pud diri sa Cagayan de Oro,” matud ni Balaba.
Samtang nagpasalamat usab si Duterte nga gitahasan nga mohurar sa mga opisyal ug gipahalipayan ang tanan ilabi ang mga katawhan sa siyudad.
“Congratulations ug mabuhay kamong tanan labi na gyud ang taga Cagayan,” matud ni Duterte.