SUPERBALITA CEBU

Rabacal: Hadlok mobalhin

Pakabana

ADUNAY usa ka anti-turncoatism ordinance ang Cebu City council nga magsilut sa mga mobalingbing kon mobalhin og laing partido. Niadtong miaging Abril si Konsehal Junjun Osmeña sa Barug PDP-Laban nangamahan niining maong ordinansahon. Nakahukom siya nga itugyan kini sa committee on laws nga maoy motuon niini. Ang maong committee gisakpan sa mga sakop sa Bando Osmeña – Pundok Kauswagan (BOPK) nga gipanguluhan ni Sisinio Andales ug vice-chairman si Eugenio Gabuya, Jr. Ang mga sakop mao sila si Dave Tumulak, Alvin Arcilla ug Joy Augustos Young.

Mas hingusgan kini karon sa mga sakop sa BOPK kay nahadlok sila nga dunay ilang mga kauban nga mobali sa administrasyon ni Mayor-elect Edgar Labella. Apan atong bantayan kon unsa ang reaksiyon nila ni Tumulak ug Gabuya niini. Sila raba ang kanunay nga hisgutan nga gustong mobali sa Barug PDP- Laban. Dakung posibilidad si Tumulak kay iya man sad nga ikulokar ang iyang kaluha ug laing igsuon sa gobiyerno sa siyudad. Apan sumala sa akong tinubdan nga dili kuno uyon si vice mayor-elect Mike Rama nga dawaton pagbalik si Tumulak kay mibiya na kini sa ilang grupo ug mi-abin sa BOPK panahon sa Rama administration. Ulitawhan usab kuno sa Barug si Konsehal Yayoy Alcoseba.

Ambut og constitutional ba kining maong ordinansahon? Apan bisan kon mapasar kini kinsa may makapugong ni bisan kinsang konsehal sa siyudad kon mopaluyo siya sa mga ordinasahon, resolusyon ug ubang kagustuhan sa Barug PDP-Laban bisan kon dili sila mobiya sa ilang partido? Maayo man unta kining maong ordinansahon apan ang nakadaut lang kay ang tumong ug tuyo sa mga konsehal sa oposisyon mao man nga aron aduna silay mayoriya aron babagan ang mga ordinansahon ug uban pang kalihukan sa mga konsehal sa administrasyon inay nga maghiusa ug mag-ambahan alang sa kaayuhan sa taga-Cebu City.

•••

Anaa pa diay ninja cops kun mga pulis nga mo-recycle sa mga iligal nga drugas nga ilang ma-imbargo? Naay mga pulis nga hidakpan nga naghimo niini. Ang maong mga iligal nga drugas mao unta ang himuong ebedensiya apan gi-negosyo kini sa mga gitawag og ninja cops. Karong bag-o hidakpan si Police Corporal Rogelio Atillo nga sakop sa Labangon Police Station Drug Enforcement Unit nga nag-recycle og dinakpang shabu. Ang police corporal makadawat na man unta og binuwan nga P40,000 apil ang allowances apan matintal gihapon ang uban kanila sa pagbinu-ang. Ang iyang commander si Police Major Keith Andaya gitangtang sa pwesto tungod sa command responsibility. Angayan man gud ang mga hepe nga masayud kon unsa ang binuhatan sa iyang sakop. Girelibuhan usab ni Cebu City Police Office Director Colonel Royina Garma ang tanang mga sakop sa Drug Enforcement Unit. Dili man hinuon tanan kanila ang nagbinuang apan napagan lang kini sila sa binuang sa ilang kaubang pulis. Maoy nakanindut sa kampanya karon batok sa iligal nga drugas kay ang tanang lakang gihimo aron walay pulis nga makahimo og abuso. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph