NIAY komedya nga daghan na nga mga taga Mindanao ang sikat karon. Aduna nay tulo ka senador nga taga Mindanao. Sila Koko Pimentel, Bato dela Rosa ug Bong Go. Ang Presidente taga Mindanao, ang founder sa Kapa, Pastor Joel Apolinario taga Mindanao ug ang tag-iya sa kalibutan mismo, taga Mindanao. Nahibawo namo og kinsay nangankon nga maoy tag-iya sa kalibutan.
•••
Adunay panultihon nga “puwede nimong ilaron ang tanang tawo sa pipila ka higayon, pipila ka mga tawo sa tanang panahon, apan dili nimo mailad ang tanang tawo sa tanang panahon.” Mao unta kini ang kanunay nga isilsil sa alimpatakan sa matag usa ka nato aron dili kita mailad anang mga tinunto sa uban labi pag maglambigit sa dakong kuwarta. Aduna pay laing panultihon nga “walay mangingilad og walay magpa-ilad.”
Daghan ang mibalikas ug mi-kondenar karon ni Presidente Duterte nunot sa iyang kamanduan nga ipahunong ug ipasira ang investment scams sama sa Kapa (Kabus Padatoon) Community Ministry International, Organico Agribusiness Ventures Corporation ug Ada Farm Agriventures. Kining tulo ka mga investments nagtanyag og dakong “return of investment” ngadto sa mga meyembro. Tiaw ba nimo kanang ang Kapa mohatag og 30 per cent interest matag buwan. Unya forever pa gyud.
Matod sa “investors” nga nganong hilabtan man sila nga ila mang kuwarta ang gi-invest ug maayo ang dagan sa patigayon. Wa may mireklamo kay nalipay ang mga miyembro kay nakadawat sa ilang return of investement o payouts. “Gift of love” o blessings ang tawag niini sa taga Kapa kay religious kining ila. Ila usab nga gibasol si Pastor Apollo Quiboloy nga maoy nagsolsol Presidente gumikan kay daghan niyang miyembro mibalhin sa Kapa.
Ang gihimo sa kagamhanan pagpahimangno lang sa katawhan aron di mahitumpawak sa kaalautan. Billion tuod ang kitaon sa Kapa gumikan sa “donations” sa mga sakop apan billion usab ang “payouts”. Labay-labay lang ning ilang interest nga ipanghatag. Asa man gikan intawon capital kining maong gropo? Sa makauna lang. Unya kadtong maulahi? Maoy makalolooy. Inig mabiktima na, adto dagan sa gobiyerno? (bobbygnalzaro@gmail.com)