PRESKO ug bugnawng hangin, mga balod nga naghampak sa batuon nga baybayon, ug makadani nga kanindot sa kabungturan, pipila lamang kini sa mga makapadani nga imong handumon sa Batanes.
Dili ikalimod nga usa sa mga dream destinations sa mga Filipino ang northernmost nga lalawigan sa Pilipinas.
Gilangkuban Batanes og unom ka mga munisipyo, mao kini ang Basco, Itbayat, Ivana, Mahatao, Sabtang, ug Uyugan.
Ang sentro sa kagamhan sa lalawigan nahimutang sa Basco nga usa sa mga munisipyo nga nahimutang sa Batan Island.
Sa Batan Island mamahimong masuroy ang pipila sa mga inila nga tourist destinations, gibuwag kini sa duha ka tour packages, mao ang North Batan ug South Batan.
Sa di pa nato pagahisgutan ang mga mamahimong suroyan sa North Batan, ato usang tukion kon unsaon pag adto sa Batanes gikan sa Sugbo.
Walay direct flight gikan sa Mactan-Cebu International Airport padulong sa Batanes, busa gikinahanglan nga mubiyahe usa padulong sa mga airports nga adunay mga eroplano nga nagserbisyo sa maong lalawigan.
Gikan sa Sugbo mamahimong mag-connecting flight padulong sa Clark International Airport (CIA) ug Ninoy Aquino International Airport (NAIA).
Kon manukad gikan sa CIA, adunay mga biyahe sa Philippine Airlines padulong sa Batanes, samtang sa NAIA anaa ang Cebu Pacific ug Skyjet Airlines.
Usa sa mga nakaapan sa pagbisita sa Batanes mao ang kamahalon sa airfare tickets nga anaa sa P3,000 pataas ang one way, kon aduna man gane promo itumong sab sa mga airline companies panahon sa ting-uwan.
Labing maayo nga mubisita sa batanes Marso hangtod Mayo diin mas gamay ang higayon sa pag-uwan, apan bisan paman panahon sa tinguwan, mudagsa lang gihapon ang mga turista.
Usa lang sa mga bantayanan kon mobiyahe og rainy season mao ang cancellation sa mga biyahe sa eroplano nga makamugna og dakong kahasol sa inyong mga plano.
Sa di pa madugay, atong sugdan ang pagsuroy sa North Batan. Adunay duha ka options sa pagsuroy, mamahimong mukuha og mga travel agencies nga nag-offer og packages, kumpleto na kini sa serbisyo ug magsakay pa mo og air conditioned nga van.
Ang naka-apan, mahal ang bayad ug mag-agad sa inyong gidaghanon ang presyo. Maayo lamang kini nga option kon grupo mo nga musuroy sa Batanes.
Kon duha o tulo ra mo nga musuroy, pilia na ang mga tricyles nga nag-offer og tour, accredited kini sila sa lokal nga kagamhanan sa Batanes ug fixed ang ilahang presyo alang sa North Batan tour nga anaa lang sa P1,000 matag tricycle.
Presko kini sakyan ug mas ma-enjoy ninyo ang mga talan-awon.
Ang unang tourist spot nga mabisita sa North Batan mao ang Mt. Carmel Church nga naila tungod sa estraktura niini nga ginama sa bato, hand-painted sab ang imahe sa mga patron sa Batanes sa kisami niini.
Gipanagiya ug gipahimo ang Mt. Carmel Church sa pamilyang Abad, ang labing maimpluwensya nga pamilya sa Batanes.
Sunod nga mabisita ang Pagasa Weather Station, dalit niini ang 360 view sa Basco diin makita ang Mt. Iraya, mga baybayon nga nagatubang sa West Philippine Sea ug Pacific Ocean, ug ang mga maanyag nga kabungturan.
Gikan sa weather station, mosunod ang Dipnaysupuan Japanese Tunnel nga ginama sa mga sundalong hapon niadtong World War II.
Aduna kini lima ka mga lutsanan nga nahimong taguanan sa mga Hapon panahon nga adunay mamomba ug muatake sa ilang lugar ug mamahimo kining sudlon ug ma-experience ang pamati samtang anaa sulod sa tunnel.
Sunod nga mabisita ang Valugan Boulder Beach diin gipasigarbo niini ang mga dagkong andesite rocks o mga dagkong bato nga gikan sa pagbuto sa Mt. Iraya nga gihulma sa mga balod nga naghampak sa baybayon.
Maagian sab ang Fundacion Pacita, usa ka mamahalong botique hotel nga gipangan kang Pacita Abad, usa ka Ivatan painter nga naila sa iyang mga ginamang trapunto o embroidered paintings.
Muabot sa kapin P8,000 ang matag gabie sa Fundacion Pacita. Kon dili kaya sa budget, mamahimo ra sab nga mangape o manihapon sa maong dapit.
Usa sa mga main attraction sa North Batan ang Vayang Rolling Hills, nag-atubang kini sa West Philippine Sea ug gituyukan sa kabungturan nga susama og balod ang porma. Bisan asa ka mulingi, paraiso gayud ang imong makit-an.
Last stop sa North Batan tour ang Basco Lighthouse nga nagbarog sa Naidi Hills nga gikan sa Ivatan nga pulong nga “Na” o karaan ug “Idi” o puy-anan.
Makita gikan sa lighthouse ang Baluarte Bay, lungsod sa Basco, Mt. Iraya, ug ang rolling hills. Apan ang labing gipaabot dinhi sa mga turista ang picture-perfect nga sunset.
Kanunay nga girekomenda nga unahon ang North Batan kon musuroy sa Batanes kay aduna pay mas mga makadani nga talanawon nga nagpaabot sa Sabtang Island ug South Batan Tour.
Atangi sa sunod nga edisyon sa Super Suroy sa Batanes ang Sabtang Island ug South Batan Tour.