TUNGOD sa tensiyon nga mitumaw karon didto sa Hong Kong, gikanselar ang 2019 CCB Hong Kong International Dragon Boat Race.
Niini, ang Philippine Acciessible Disability Services, Inc. (Pads) Adaptive Team napugos wala na lang usab mopadayon sa ilang biyahe.
“We’re already at the airport when we learned about the cancellation of the race due to the situation in Hongkong right now,” matod ni Pads’ executive director John Paul Maunes sa interview sa Sun.Star Cebu.
Niadtong Hunyo 12 sa gabii pa unta mopaingon sa Hongkong ang team.
Sa nasayran, nga nanggawas ug miprotesta karon ang mga residente sa Hongkong tungod niining kontrobersiyal nga extradition law.
Gikataho nga adunay nahitabong kagubot tali sa mga protesters ug sa mga tinugyanan sa balaod diin gibanabana nga moabot ngadto sa 70 ka mga tawo ang nanga-angol.
Tinguha unta sa Pads nga sa ikatulong higayon depensaan ang ilang titulo sa kompetisyon nga sugdan karong adlawa.
“I think we have to find another local race,” matod ni Maunes.
Ang Pads nangandam usab alang sa DragonBoat World Championships sa Pattaya, Thailand.
We have to make a very painful yet practical decision. It’s for the benefit of the safety and security of our paddles,” dugang ni Maunes. Gipasabot ni Maunes nga ang registration fee ra ang iuli sa mga nagpasiugda samtang ang ilang booking alang sa ilang gipuy-an ang dili na gyud makuha pa nila og balik. (RSC, JBM)