HEPE sa Cebu City Police Office mosusi una sa armas nga idonar sa Cebu City Council ngadto sa kapulisan sa Siyudad sa Sugbo tungod kay halos kompleto sa ilang service firearms ang kapulisan sa dakbayan.
Ang Konseho sa Siyudad sa Sugbo niuyon nga hatagan og gahom si Mayor Tomas Osmeña nga idonar ang 437 ka mga armas nga gipanag-iya sa Kagamhanan sa Dakbayan ngadto sa Cebu City Police Office.
Apan matod ni Police Colonel Royina Garma nga ila pang tan-awon kay wa pa siya makakita sa maong mga armas nga giingong ihatag sa Siyudad ngadto sa iyang mga sakop.
Iyang gipasabot nga ang Philippine National Police (PNP) adunay tukma nga klase sa armas nga standard sa matag personnel.
“Kompleto naman ng baril ang pulis. Halos one is to one na man kami. Tingnan lang natin kasi may specification kung anong klasing baril kailangan namin,” matod ni Garma.
Wa siya magduda sa katuyoan sa administrasyon ni Mayor Tomas Osmeña sa kalit nga pagpanghatag niini sa armas.
Kini human sa nanglabay nga mga buwan nga kanunay nga sawayon sa mayor ang kapulisan sa siyudad sa Sugbo tungod sa pasangil nga nagamit sa politika.
Ang 437 ka mga armas una nang gihatag sa kagamhanan sa siyudad sa Sugbo sa mga pulis apan niadtong 2016 gibawi ni Mayor Osmeña.
Apan gipabalik ra usab ni pipila ka buwan ang nakalabay human nibahad si kanhi Police Regional Office 7 Director Noli Talino nga ipaimbargo ang mga armas tungod kay expired na ang mga lisensya.