DILI tahuron ni Mayor-elect Edgardo Labella ang resolution sa konseho nga nagdili sa paggamit sa halin sa 45.2 ektaryas nga yuta sa South Road Properties niadtong tuig 2015.
Matod pa ni Labella nga way kahulogan ang maong resolution sanglit ang konseho dili makalabaw sa hukmanan sa pag-interpret sa balaod.
“Only the court can voide any transaction. Dili na mahimo sa konseho nga maka-declare og usa ka kontrata nga void because it is only the court of law. Para nako wala toy kahulogan kay it is beyond the power of the council to do that,” padayag ni Labella.
Si Konsehal Sisinio Andales, kaalyado ni outgoing Mayor Tomas Osmeña maoy nipasar og resolution nga giaprobahan sa konseho sanglit sila ang mayoriya.
Si Knsehal Dave Tumulak ni-abstain samtang supak silang Konsehal Raymond Garcia, Joy Pesquera, Joel Garganera ug Pastor Alcover Jr..
Si Labella nagkanayon nga gi-upheld sa Court of Appeals ang decision sa Regional Trial Court (RTC) nga legal ug binding ang kontrata nga gisudlan sa City Government ug sa tulo ka dagkong developer nga mao ang Filinvest, Ayala Land ug SM Prime Holdings Inc.
Ang City Government nakadawat na og P8.35 bilyones gikan sa halin isip 50% downpayment upat na katuig ang nakalabay.
Ang incoming mayor niingon nga iyang sundon kon unsay nalatid sa balaod diin ang mga kaso nga gisang-at batok sa pagbaligya sa maong yuta kaniadto pulos gibasura sa korte ug nihulagway nga legal ang pagbaligya sa maong yuta.
“Dili molabaw sa pag-interpret sa provision sa balaod ang konseho kay sa husgado. Dili kana maoy usa sa mga responsibilidad sa konseho pagdeklara kay dili sila hukmanan.Bisan unsay ilang katuyoan, ang akong subayon mao ra gyud kon unsay husto ug unsay nakalatid sa balaod.” Dugang ni Labella. (PAC)