TULO ka mga senador ang ikatambayayong ni Mayor-elect Edgardo Labella para sa pagbubo og proyekto ug pagtunol sa mga batakang serbisyo sa dakbayan sa Sugbo.
Sila mao si Senator elect Bong Go, Ronald Dela Rosa ug Imee Marcos kinsa pulos niya kaalyado ug gidala ang kandidatira sa niaging piniliay uban sa laing siyam ka kandidato sa PDP-Laban
Matod ni Labella nga motabang si Dela Rosa aron mabatonan sa dakbayan ang kahusay ug kalinaw mga maoy iyang campaign promise inubanan sa 24 oras nga serbisyo.
Si Labella nitambong sa thanks giving party ni Dela Rosa ug Marcos sa miaging gabii sa managlahi nga venue ug ni Go niadtong Sabado, Hunyo 8.
Si Dela Rosa, atol sa iyang pakigpulong, nagkanayon nga suportado sa katawhang Pilipino ang programa sa Philippine National Police nga War on Drugs diin siya number 1 senator sa Metro Manila ug Overseas Filipino Workers.
Si Go, kinsa ‘amahan’ sa Malasakit program ug responsabli sa 34 ka Malasakit Center sa tibuok Pilipinas, mohatag og ayuda sa dakbayan pinaagi sa pagbutang og susamang buhatan sa bag-o nga Cebu City Medical Center sa Septiyembre niining tuiga.
Si Labella nagkanayon nga base sa ilang panag-estorya ni Marcos, iya sab tabangan ang Sugbpinaagi sa iyang mga proyekto nga madala sa dakbayan lakip na sa lalawigan.
Nagpasalamat sab si Marcos sa mga Sigbuanon kinsa nihatag kaniya og kumpyansa para hatagan siya og mandato para manerbisyo isip senador.
Iyang gihulagway ang taga Cebu nga wise voters kay bisan kon niingon ang iyang mga kritiko nga ang Sugbo anti-Marcos apan gisaligan gihapon siya butang nga iyang suklian sa maayong serbisyo.
Si Labella ug ang tulo ka senador uban sa ubang mananaug sa miaging piniliay molingkod sa Hunyo 30. (PAC)