SUPERBALITA CEBU

Coop gidudahang ‘nang-scam’

GIREKLAMO: Si James Paul Catian, sa iyang Facebook post, mireklamo batok sa God the Father Almighty Credit Cooperative nga wa na mouli sa iyang kwarta nga gi-down alang sa usa ka motorsiklo. Sa pagsusi sa Sunstar news team, di lang kay siya ra ang nireklamo, apil na diay ang laing 20 kapin ka mga tawo nga naka-down na alang sa two-wheeled ug four-wheeled nga mga sakyanan. Nagbutang og pahibawo ang kooperatiba sa ilang gate, apan sirado gihapon ang ilang buhatan. Lain na sab kaha kini nga scam? Estorya sa pahina 2. (Screenshot sa Facebook post ni James Paul Catian)

USA ka grupo sa mga tawo namasangil nga sila “na-scam” human ang usa ka kooperatiba nga nisaad nga kanila nga ipang-release ang ilang mga sakyanan nga gusto nilang paliton paglabay sa usa ka buwan di nila ma-contact.

Si Paul Catian, usa sa mga “biktima”, niila sa kooperatiba nga mao ang God the Father Almighty Credit Cooperative (GFACC) nga nahimutang sa Tisa, Cebu City, nga gitukod sa usa ka Chris Tundag, matod ni Catian.

Facebook

Si Catian niasoy nga human siya nakakita og post sa coop sa marketplace sa Facebook, naengganyo siya tungod sa iyang napalgang mga benipisyo.

Matod sa usa ka agent nga niatubang kaniya, kon makahatag na siya sa down payment, ang item ipagawas dayon human sa usa ka buwan.

Ang binuwan nga interest tag 15 porsyento lang.

Niadtong Marso 13, 2019, nihatag siya og down payment nga P13,900 alang sa usa ka motorsiklo nga iyang gustong paliton.

Suma sa gisaad, niadto untang Abril ma-release ang sakyanan, apan wa kini mahitabo.

Niangkon si Catian nga nirisgo siyag dako, apan iya kining gihimo tungod kay duna siyay gikaestoryang pipila ka buyers ug gisultihan siyang kini lehitimo.

Kanunay siyang nag-contact sa agent ug kawani sa kooperatiba, apan giiingnan lang siyang magsige og follow-up.

Human sa pipila ka mga semana nga pagsige og balikbalik sa opisina, nakigkita siya sa ubang buyers nga dunay susama kaniyang kasinatian.

Matod ni Catian nga dunay 300 ka mga buyer nga sama kaniya wa makakuha sa unit.

Niadtong Mayo, nagtagbo sila ug nagkasinabot nga mangayog refund. Human niini, iyang gi-contact ang numero sa staff pag-usab, ug nisulti kini kaniya nga i-file kini ug dad-on ang mga dokumento sa ilang opisina sa Tisa, Dakbayan sa Sugbo.

Dihang naduso na niya ang request forms, si Catian niingon nga gisultihan sila nga maghuwat hangtod sa Hunyo 4 kay ang ilang refunds i-release nianang adlawa.

Apan matod ni Catian nga paglabay sa mga semana human siya maka-submit, kanunay na sirado ang opisina.

“When we went there on the promised date, the office was closed and we were only told by the people living nearby that the office has been closed for already three weeks,” nagkanayon si Catian.

Si Catian niingon nga nipadala na sila og letter of complaint ngadto sa Cooperative Development Authority (CDA) ug nagpa-blotter ngadto sa Police Station 10 sa Labangon, Cebu City.

30 nangreklamo

Si Police Chief Master Sergeant Deo Clarin, Police Station 10 chief investigator, niingon nga nakadawat sila og mga 30 ka complaints sukad niadtong Mayo.

Gawas sa complaints nga wa sila makakuha sa refunds, si Clarin niingon nga nakadawat usab sila og mga reklamo nga gipanghatagan sila og mga tseke sa coop, apan sa ilang paghikay sa banko, ilang nakaplagan nga ang mga tseke depektuso.

Matod ni Clarin nga duna pay makausa nga usa ka complainant nihilak sa ilang buhatan kay naka-down na siya og mga P400,000 alang sa usa ka Mitsubishi Montero.

Sa 30 ka mga complainant, matod ni Clarin nga duha pa lang ang naka-file sa blotter report alang sa pagpasaka og kaso.

Sa ilang pagreklamo, si Clarin nitambag kanila sa pagkuhag certification gikan sa bangko diin ang mga tseke nanguntol ug demand letter nga naka-address sa coop aron sila maka file og kasong estafa batok niiini.

“Even a mail showing that the complainant has sent a demand letter to the concerned office can be considered,” pasabot ni Clarin.

Narehistro

Si Cooperative Development Authority (CDA) 7 legal division lawyer Fritzie Lacanaria nikompirmar nga ang GAFCC narehistro sa ilang opisina isip “credit cooperative.”

Base sa ilang record, ang GAFCC narehistro sa ilang opisina niadtong Disyembre 2, 2017.

Sa pagkakaron, si Lacanaria niingon nga ang status sa mao nga coop mao nga ang cerfiticate of compliance ila unang gipugngan.

Apan wa siya makahatag og katarungan kay naa kini ubos sa laing departamento ug ang in charge niini nag-leave.

Matod ni Lanaria nga mo-review pa sila sa mga suwat reklamo nga gipadala kanila, ila dayon kining i-evaluate aron pagsuta kon unsa nga lakang nga ilang pagahimuon.

“We are still reviewing the complaints and we will take an action as soon as possible,” nagkanayon si Lacanaria.

Ang SunStar Cebu nisuway sa pag-contact sa mga numero sa GAFCC, apan way nanubag.

Gi-contact usab si Tundag pinaagi sa Facebook Messenger, apan sa pagsuwat ning taho, wa pa siya motubag.

Ang news team niadtop usab sa ilang buhatan sa Tisa, apan way staff nga niatubang o tag-iya. Ang gate gikandaduhan usab.

Sa gate ilang buhatan, ang management nagbilin og notice alang sa ilang mga miyembro ug kliyente nga nipasabot nga ang opisina temporaryong sirado apan mahikay ang refunds ug alang sa seguridad ug kaluwasan sa mga coop staff.

Mobukas sila basta ang reports ma-submit ngadto sa ilang mga supplier ug ang refunds mapadala pinaagi sa pawnshops, sumala sa nasuwat sa pahibawo.

Ang notice duna usay contact number nga ma-contact alang niadtong mo-file sa ilang refunds ug ubang mga transaction.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph