KAHINUMDUM pa kamo nga na-bash ang singer-host sa It’s Showtime Billy Crawford tungod sa komento niya sa Tawag ng Tanghalan contestant nga may Bisaya accent ug diction?
Ang contestant mao si Lorilae Franzani, nahimugso sa Samal, apan dinhi na nagdako sa Davao City.
Ang iyang pagkakontesera ug damgo nga mahimong singer midala na kaniya sa nagkadaiyang lugar.
Si Lorilae nagdako sa pamilya nga mahiligon sa karaoke sessions.
Ang inahan niya maayo mokanta, samtang ang iyang uyuan maayo mogitara.
Sa edad nga singko anyos, gibansay na si Lorilae nga mahimong singer.
Tungod nagpuyo duol sa dagat, gisulti niyang na-experience sab niyang mokantaw samtang gilublob sa dagat sama sa singer nga si Regine Velasquez.
Sa pag-abot niya sa edad nga otso, nagsugod na siya og apil sa mga singing contest hangtud karon.
Niadtong 2013, mibiya siya sa Davao aron mahimong professional singer sa Korea.
Apan paglabay sa lima ka tuig, nakadesidar siyang mouli sa nasud ug moapil sa national singing competition nga Tawag ng Tanghalan sa It’s Showtime.
Damgo niya nga makitang mokanta siya sa telebisyon.
Usa sa hurado, si K Brosas, natagad ang iyang tingog nga husky ug mala-rockstar.
Apan si Billy misulti nga mas maayong i-improve niya ang iyang diction. Tungod niini gisaway ang TV host.
“When Billy [Crawford] said that it was actually okay for me because they are the judges and they actually have their own opinions about my singing,” suma niya.
Dugang sa singer nga ang exposure niya sa Tawag ng Tanghalan nagbukas og daghang oportunidad kaniya.
Hangtud nahimamat niya si Ato Arman, usa sa contestants sa Tawag ng Tanghalan nga misaad nga himuan og kanta si Lorilae.
Uban sa suporta sa iyang uyab nga si Querino Franzani nga nagsilbi niyang managing director, si Lorilae na-invite sa daghang guestings ug ubang singing events.
Pila ka bulan ang milabay, nahimamat niya si Arman ug gihatag kaniya ang kanta nga sinuwat niini.
Ang “Ito ang Araw” usa ka kanta labot paghigugma.
Marso ning tuig nalusad ang kanta ug kini ang una niyang single. Ang kanta available sa Youtube ug Spotify.
“This is actually a song about marriage. And we are hoping to have this song sung during our marriage soon,” tsika sa 30-anyos nga singer.