DAGHAN na gyud ang naguol, kay basin dili na sila maka-“pay out” kay lagi nanira na ang gipang-ronda nga mga money investment schemes.
Diha sa’y pipila nga nagmalaumon gihapon luyo sa nahitabo, labi na kadtong nagpaila gyod nga mga “risk takers” sama sa akong higala.
Akong higala man gud, daw wala lang kaniya dihang iyang nasayran nga nanira na ang buhatan sa iyang naapilan, kay lagi garbo niya nga usa siya ka risk taker.
Ang uban sab nga nagpailang mga risk takers, pero diha’y higayon nga di gyud nila madawat, nagsige nalang og panugilon sa iyang gibati, kay lagi nakulbaan na.
Among silingan sa Davao Occidental, dili na motunong sa takna sa iyang kaon, magsige nalang og hinuktok, kay nabaligya na iyang karabaw, kay gi-invest, resulta daw mora’g nalisoan na siya sa iyang maayong pangisip.
Nahimuot sab ko kay ang akong suod nga higalang magtutudlo, nagbutang gyud og radyo sa lamesa sa faculty aron makapaminaw sa update sa pag-silbi sa search warrant sa kapulisan.
Bisan asa nga kanto sa panagtapok, pay in ug pay out ang hisgutan, trending pa kaayo kaysa half-shot sa Raptors ug Warriors sa NBA.
Niining nahitabo karon, daw usa ka butang nga maingon ta nga hinayhinay nga dawaton sa mga investors ang kamatuoran, -- usa ka kamatuoran nga kung subayon, daan na unta kitang nasayod, apan misulay lamang kita.
Sa mga investors, kinahanglan nga magmalaumon gihapon kita, unya nata moingon nga na-scam kita kung dili na gyud kita maka pay out gikan sa taas nga panahon.
Diha’y mga migula nga balita nga naghinayhinay na sa pagbalik sa ilang operasyon ang pipila, hinungdan nga nalipay ang mga investors.
Unta mag pay out sa kita, aron ang tanan malipay kay ang gikapital nato niini hilabihan baya kataas sa sugilanon hain gikan ang salapi.
Lain pa’y atoa, unsa kaha katinuod ang migula kagahapon nga balita sa social media nga milagda na KUNO si Presidente Rodrigo Duterte sa usa ka pagtugot nga ang mga investment schemes legal na nga tugtang makapadayon sa ilang operasyon?
Ops, kining tanang, hungihong lamang, ug wala pa’y napakita nga usa ka legal nga kamatuoran, atangan nalang nato unsay resulta niini didto sa unahan.