GENERAL SANTOS CITY -- Gatusan ka mga miyembro sa Kapa (Kabus Padatoon) Ministry International Inc., nga gikan sa probinsiya sa Davao del Sur midayo aron mosalmot sa duha ka adlaw nga prayer rally nga gisugdan kagahapong adlawa, Hunyo 13 hangtud karong adlawa.
Si Ian Porsuelo, 43, gikuyog ang iyang unom ka sakop sa pamilya diin nanukad pa sa lungsod sa Matanao.
“Amo ning gibuhat aron suportahan si founder Pastor Joel Apolinario ug aron ipakita nga daghan ming mga sakop sa Kapa nga natabangan niya,” asoy niini.
Si Jeville Jimenez, 26, taga Digos City, gidala pa ang iyang 7-anyos nga anak, aron mohatag og suporta sa mga kaubanan sa Kapa.
“Nausab gyud among sistema sa panginabuhi kon itandi kaniadto, di na mi maglisud pagpalit og bugas,” niya pa.
Sukad adlaw’ng Martes, Hunyo 11, nagsugod na og dagsa ang mga sakop sa Kapa diin ang uban gikan pa sa kaulohang Manila.
Gihimo ang prayer rally sa P. Charon Sport Complex nga gisugdan alas 6 sa buntag samtang karong adlawa, Biyernes, Hunyo 14, himuon sa oval grand stage ang ilang rally sanglit gihatagan sila og permit sa lokal nga kagamhanan.
Gihulagway nga mokabat sa 50 ngadto na 60 porsiyento sa ministriya ang mitambong sa prayer rally.
Kahinumdoman nga nanganti ang mga miyembro nga ilang ipaabot ngadto sa gobyerno ang ilang sentimento human ang unang pamahayag ni Pangulong Rodrigo Duterte nga pasirad-an ang Kapa.
Misamot ang kasuko sa mga miyembro dihang gironda sa National Bureau of Investigation ug Criminal Investigation and Detection Group ang balay ni Apolinario ug mga buhatan sa Kapa sa nagkadaiyang bahin sa nasud.
Matud ni Presidente Duterte nga usa ka Ponzi scheme ang Kapa apan gipamugos ni Apolinario nga donasyon ang gipundong salapi sa mga miyembro diin adunay 30 porsiyentong tubo. (Orlando B. Dinoy)