USA ka taksi nga dunay sakay nga tulo ka indibidwal, lakip ang drayber, gilampurnas sa kalit nga pagbaha (flash flood), giubanan sa mga dagkong troso bandang alas 10:30 sa gabii niadtong Miyerkules, Hunyo 12, tungod sa kusog nga pagbunok sa ulan.
Sa paghinabi uban ni Davao City Disaster Risk Reduction Management Office (CDRRMO) head Rodrigo Bustillo Huwebes, gitug-an niini nga sa dihang nahitabo ang insidente, ang Department of Public Works and Highways (DPWH)-Davao nagpatuman og temporaryong pagsira sa C.P. Garcia Highway (Diversion Road) gikan sa nagsangang mga dalan gikan sa Ulas hangtud sa may Ma-a Road tungod sa nakaung-ong nga hulga sa paglihok sa yuta duol sa Las Terazas.
Ang mga motorista gitambagan nga moagi sa alternatibong rota samtang gihimo ang clearing operations. Apan Huwebes sa buntag, human gihimo ang paglimpyo, maagian na kini sa mga motorista.
Gisulti ni Bustillo nga gihimo nila ang precautionary measure tungod sa risgo sa taas nga bahin sa lugar kon diin nagpadayon ang road widening ug construction sa drainage system ug dunay posibilidad nga ang imburnal mahulog.
“But this morning, gitanggal naman sa contractor tong mga culvert so mao to nga gi-open na nato pwede na maagian but kung duna na pod pag-ulan nga himoon, kung dunay mga threats nga atong makita, then we will advise again the closure of Diversion Road,” dugang ni Bustillo.
Hinuon ang tulo ka mga indibidwal nakaangkon lang og diyutay nga mga angol atol sa insidente human ang taksi gipadpad sa tubig.
Nasayran nga ang taksi gikan sa airport aron nga mokuha og mga pasahero.
Mga alas 8 sa gabii, nisugod na og bundak ang kusog nga ulan ug samtang sila naglatas sa Diversion road, kalit silang gilampurnas sa tubig nga dunay mga troso.
Gitug-an ni Bustillo nga kini nahitabo sa dihang ang kural sa construction site giingong nahugno ug ang naakomodar nga tubig nihaganas.
“Pagbaba sa tubig, mao to nadala ang kahoy mga yuta, mga debris, mga boulders, pagkahagsa ato, timing nga maoy pag-agi sa taxi gikan sa airport. Pagtunong nila maoy pagkahagsa mao tong nabanlas sila sa kilid na side sa tabok,” asoy ni Bustillo. Ang taksi naguba.
Human sa insidente, gitambagan ang DPWH nga iseguro ang kaluwasan sa katawhan kon magkonstrak sila og mga proyekto aron nga di na masubli ang maong insidente.
Ila sab nga gipalihok ang mga personahe gikan sa mga barangay sa Maa ug Langub nga mopahimutang og “warning signs” aron pabantayon ang mga motorista sa peligro tungod sa mga bakilid sa maong mga lugar.
Dugang niya nga Huwebes sa hapon, dunay laing hugna sa “assessment” uban sa Mines and Geosciences Bureau aron nga makahatag og “analysis” sa maong kondisyon.