TRESE ka kompanya sa Dakabyan sa Mandaue ang gihatagan og show cause order sa kadagkuan sa Social Security System (SSS) batok sa mga employers nga aduna'y mga violations Biyernes, Hunyo 14, 2019.
Ang SSS gikan sa kauluhan sa Central Visayas ang nihimo og operasyon tungod sa mga violations sa mga employers sama sa wala pag-remit sa mga kontribusyon sa ilang empleyado, under-declared salaries, mga wala marehistro sa SSS ug uban pa.
Trese ka mga kompanya sa Mandaue ang gihatagan og show cause order human nga kapin sa usa ka tuig na nga gitawag ang atensyon.
Sigon sa SSS, gipadad-an na og demand letter ang mga kompanya apan giingon nga wala mituman sa ilang obligasyon.
Sama pa, gihingusgan kini karon sa SSS. Nagpadayon usab ang ilang condonation sa mga penalty niadtong mga naka-violate nga employer, gikan sa bulan sa Marso hangtod Setyembre 2019.
Lakip sa gituyo sa Run After Contribution Evaders Team sa SSS ang buhatan sa Giardini del Sole, usa ka sikat nga furniture manufacturing company.
Matud ni Helen Solito, senior vice president sa SSS Visayas, usa kini sa pipila ka tuig nga wala na ka-remit sa ilang contribution sa SSS.
Nakig-atubang ug gipasabot sa ilang habig ang tag-iya sa Giardini del Sol nga si Goivanni Boschi ug nipasalig nga motuman na ilabi na karon nga aduna'y condonation program alang mga violation. (Superbalita Cebu)
(Ang kini nga balita nag-update pa. Mahimong mobalik sa www.sunstar.com.ph/SUPERBALITA-CEBU o i-refresh ang page alang sa dugang nga mga detalye.)