HUMAN sa bugnong lugaynon si Gov. Junjun Davide mipadayag gilayon og suporta sa umaabot administrasyon ni Gov. Gwen Garcia.
Apan dili sayon kadtong gidangatan ni Garcia nga siya nasuspenso sa pagpanglutos ni Davide hangtod nga giputlan sa koriyente ug tubig, gi-padlock ang governor’s office human sa pipila ka adlaw nga gihakop sa pagpanghulga.
Labing siguro makapasaylo si Garcia apan dili makalihay si Davide kabahin sa kaso sa katukoran sa 20 ka andanang Torre ni Davide. Korte ang maghukom. Marso 26, 2019 sila Garcia ug Board Member Alex Binghay misang-at og kasong sibil ug injunction ngadto sa RTC-Toledo pagpugong sa katukoran.
Maoy sinumbong sila si Davide, Vice Gov. Agnes Magpale, BAC Chairman Mark Tolentino, WT Construction ug DBP.
Dakong illegal ug nakalapas sa tulo ka balaod nga walay authority gikan sa hunta probinsyal ang pagpirma sa deed of assignment, nakalapas sa contract agreement tali sa WT ug walay pagtugot gikan sa National Heritage Commission nga nagdili paghimog bag-o ingon man modernong edipisyo tapad sa Kapitolyo nga gideklarar nga National Heritage Landmark sa 2008.
Si Whisleblower Cris Saavedra misang-at usab og kasong kalapasan sa bidding process batok nila ni Davide, Tolentino, General Services Officer Jone Siegfred Sepe, Engr. Hector Jamora, Budget Officer Danilo Rodas, Donato Villa, WT nga silang Josefino Roberto Lim, Edgar Carredo, Rey Mariñas, Rica Marie Lañojan, Chrissie Jane Iman ug mga sakop sa BOD.
Si Rick Ramos, kanhi opisyal sa Anti-Corruption Commission mitataw nga overpriced ang 1.3B pesos nga gigahin sa maong proyekto kay sa kwentada sa mga eksperto mogasto lamang og P1 B.
Mangutang pa gyud og 1.5B pesos sa DBP nga ang mga Sugbuanon maoy magpas-an sa bayranan. Mao ray makagamit ang naa ra sa dakbayan sa Sugbo nga wala gani maghatag og buhis ngadto sa probinsya.
Nunot niini si Garcia miabiso sa WT nga hunongon ang implementasyon sa Torre ni Davide. Miabiso usab sa DBP sa dili pagproseso sa pundo kay mahulog kini og behest loan.
Tinguha gihapon sa administrasyon ni Garcia nga debt-free ang lalawigan aron dili mag-antos ang mga magbubuhis. Sa unang hugna sa pangalagad walay utang ang Kapitolyo apan nakahatod og mga serbisyo ug proyekto. Usab dili angayng mangutang sanglit ang Sugbo maoy richest province sa nasod.
Laing kadudahang tukoron mao ang upat ka andanang parking structure sa Kapitolyo nga naa namay parking area. Hinoon nalantawan nga dili sab kini mapadayon.
Usab si Garcia mikwestyon sa pagbaligya sa 14 ka luna sa probinsya nga balig 1.4 ektarya nga mga prime lots nga anaa mahimutang sa New Era sa Mabolo, Nivel Hills sa Busay, Paseo Gdendolyn, Maria Luisa Estate Subdivision sa Busay, Mahiga sa Banilad ug Camputhaw.
Para asa ang halin sa maong luna? (csa_1156@yahoo.com/09064648954)