DILI halayo ang posibilidad nga makuha sa PDP-Laban Barug ang mayoriya sa konseho sa dakbayan sa Sugbo sa dili pa moabot ang Hunyo 30, ang petsa sa opisyal nga paglingkod sa mga bag-ong napili ug nasublian nga mga konsehal sa dakbayan.
Kini tungod kay subling gi-disqualify si konsehal Alvin Arcilla sa Commission on Election (Comelec) en banc pinaagi sa pagbasura sa motion for reconsideration nga iyang gipasaka.
Mao usab kini ang mahitabo ni konsehal Sisinio Andales kay sila mang duha ang gi-petisyonan sa usa ka Allen Canoy niadtong Oktubre 22.
Ang duha nga pulos sakop sa BOPK na nang gi-disqualify sa lower division sa Comelec niadtong 2018 human masuta nga napupos na ang tulo nila ka sunodsunod nga termino.
Gisalikway ang ilang rason nga naputol na ang ilang termino sa dihang gipangsuspenso sila uban sa laing 10 ka mga konsehal niadtong 2016 tungod sa ilang pagpagawas og P20,000 isip financial assistance sa mga empleyado sa City Hall human sa linog ug bagyong Yolanda nga miigo sa Central Visayas.
Sa resulta sa niaging piniliay, ang BOPK maoy anaa sa mayoriya, 11-7, lakip sa duha ka ex-officio--ang SK chairman ug ang ABC president. So, kon makuhaan sila og duha mahimo na unyang patas, 9-9, ang konseho. Ning sitwasyona, pabor na ang PDP-Laban Barug kay anaa man nila si vice mayor-elect Michael Rama.
Mohulip unya ni Andales ug Arcilla mao sila si Jerry Guardo sa BOPK ug Joel Garganera sa Barug nga maoy ikasiyam ug ikanapulo sa north district.
Si Guardo nga kanhi sakop sa Barug, mipadayag nang daan nga mosuporta sa administrasyon ni Labella.
Hinuon, aduna pay lima ka adlaw si Andales ug Arcilla nga moapelar sa Supreme Court ug pagkuha og temporary restraining order (TRO). Kini maoy katapusan na nilang hunat. Ato ning atngan.