SECTIONS
Friday, July 19, 2019
SUPERBALITA CEBU

“We The North; We The Champs”

KAMPIYON: Nagsaulog ang mga magduduwa ug coaching staff sa Toronto Raptors human nila napusgay ang gingharian sa back-to-back champions Golden State Warriors kagahapon sa NBA. Ang Raptors ningpukan pag-usab sa Warriors sa Game 6, 114-110, aron humanon ang finals series, 4-2. (AP)

GIUSBAN pagbuntog sa Toronto Raptors ang ang host Golden State Warriors, 114-110, sa Game 6 aron humanon ang finals series, 4-2, ug angkunon ang labing una nilang titulo gikan sa ilang pagsulod sa National Basketball Association (NBA), 24 ka mga tuig na ang nakalabay.

Ang “We the North” nahimo na karong “We the Champs” sa pagpangulo sa bag-o nilang lider nga si Kawhi Leonard, kinsa gitawag na og “King of the North.”

“I wanted to make history here. That’s what I did,” matod ni Leonard.

Si Leonard ug ang Raptors mao ang naghatag sa Canada sa labing una niining mayorihiyang titulo isip usa ka nasod sulod sa 26 ka mga tuig.

Bisan wala ang usa sa ilang labing pambato nga si Kevin Durant, kinsa adunay right ruptured Achilles nga angol, ang Warriors ningpakita og kasingkasing sa usa ka back-to-back champions ug nakasukol gihapon kini’g insakto.

Apan sa wala damha, misamot kabug-at ang gipas-ang kalbaryo sa Warriors gumikan kay naangol ang tuo nga tuhod sa lain nilang sinaligan nga si Klay Thompson sa nahabiling 2:22 minutos sa 3rd quarter.

Niadtong higayuna, milusot si Thompson gikan sa usa ka fast break play diin gi-foul siya ni Danny Green.

Sa pagtugpa ni Thompson, migunit dayon siya sa iyang tuo nga tuhod ug tatawng nagping-it siya sa kasakit.

Human niini, napuno sa drama ang esena gumikan kay dihang naglakaw si Thompson paingon sa ilang locker room aron susihon ang iyang kondisyon, adunay nipahimangno kaniya nga dili na siya makabalik og duwa kon dili niya maitsa ang duha ka freethrows nga bugti sa foul nga iyang nakuha gikan kang Green.

Bisan nagtakiang, mibalik si Thompson sulod sa korte aron moitsa og freethrows sa pamasin nga makabalik ra siya og duwa.

Napasulod ni Thompson ang iyang duha ka freethrows aron hatagan ang Warriors og 85-80 nga labaw niadtong higayuna.

Human niini, mibalik si Thompson sa locker room ug nasuta nga nakasinati kini og torn ACL ug dili na kini makabalik sa duwa.

Si Thompson mibiya sa duwa nga adunay 30 puntos lakip na niini ang upat ka three-point shots.

“More than the what-ifs is just feeling bad for the players involved. Injuries are always part of the NBA season — any professional sport, injuries play a huge role,” matod ni Warriors coach Steve Kerr.

“It’s just the nature of these injuries, the severity of these injuries. And we’ll know more about Klay. But we can sit here and say, well, if this hadn’t happened or that hadn’t happened, that doesn’t matter. What matters is Kevin Durant is going to miss next season with an Achilles tear and Klay suffered a knee injury.”

Ang pagkawagtang ni Thompson napahimuslan sa Raptors hilabi na sa hinapos nga bahin.

Ang Raptors gipangulohan nila ni Pascal Siakam ug Kyle Lowry pinaagi sa ilang 26 puntos matag usa, si Leonard, kinsa maoy napiling Finals MVP, ug Fred VanVleet midugang og 22 puntos matag usa samtang niamot og 15 puntos si Serge Ibaka.

Si Andre Iguodala midugang og 22 puntos alang sa Warriors, mihatag og 21 puntos si Stephen Curry samtang niamot og 12 pun tos si DeMarcus Cousins. (AP, ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph