MGA duwa karon:
4:30 pm- Talk N’ Text batok Meralco
6:45 pm- Alaska batok Phoenix
Sakmiton og suway sa Talk N’ Text KaTropa ang ikaupat nilang sunodsunod nga kadaugan sa ilang pagpakigsangka sa Meralco Bolts sa premirong duwa karong hapon sa Philippine Basketball Association (PBA) Commissioner’s Cup sa Araneta Coliseum.
Sa kinatibuk-an, ang KaTropa adunay 5-1 nga rekord ug usa sa labing kuyaw’g gipakitang kombati sa kasamtangan.
Sa ilang tinguha nga mapakgang ang KaTropa ug pabuylohon ang ilang kampanya, ang Bolts ningkuha og bag-ong import nga si Jimmie Taylor, kinsa maoy temporaryo nilang ihulip kang Gani Lawal.
“Our import, Gani Lawal, has been bothered by a hamstring injury lately so we have placed him in the injured list and we have brought in a new import by the name of Jimmie Taylor,” matod ni Meralco coach Norman Black.
“Jimmie will play versus TNT. He is 6’9, 250 lbs and is a defensive presence in the paint area.”
Ang Bolts adunay 3-3 nga rekord.
Sa main game, magsangka ang Alaska Aces ug Phoenix Pulse Fuel Masters.
Ang Aces adunay 4-2 nga rekord ug gikan kini sa tulo ka sunodsunod nga kadaugan.
Sa ilang bahin, ang Fuel Masters adunay 1-3 nga rekord ug gikan kini sa duha ka sunodsunod nga kapildihan.
Dili ikalimod nga taas ang moral sa Aces apan nagkanayon si Alaska coach Alex Compton nga delikado nga kontra ang Fuel Masters hilabi na nga mobalik na ang ilang coach nga si Louie Alas. (ESL)