KURYOSIDAD ang nagdala sa Cebuana ultra marathoner sa paglampos niya sa 580 ka mga kilometro nga dagan gikan sa Luneta Park sa Malate, Manila hangtod sa Pagudpud, Ilocos Norte niadtong Hunyo 3-9, 2019.
Nahuman ni Rhoda Caballero-Oporto ang maong marathon sulod sa unom ka mga adlaw.
Ang ultra marathon, matod ni Oporto, kay usa ka klase sa marathon diin ang pagdagan kay molapas sa 50 ka mga kilometro.
Kini nga ultra marathon gihulagway nga labing layo'g distansya sa tibuok Pilipinas.
Bisan dili kini ang labing unang ultra marathon nga giapilan ni Oporto, para niya kini ang labing lisod kay mao sab kini ang labing layo nga dagan nga iyang naabot.
“Very challenging kaayo kay taas kaayo,” segun ni Oporto.
Sa iyang pagsalmot sa ultra marathon, kauban niini ang daghang sakripisyo nga iyang gibuhat, gikan sa iyang preparasyon hangtod sa finish line.
Matod ni Oporto, sa sulod sa unom ka mga adlaw, inihap lang nga oras ang iyang tulog sanglit dili siya makapalabi og pahuway tungod kay aduna siya’y oras nga giapas.
Sa unom ka mga adlaw niya nga pagdagan, swerte na siya kun makatug og usa ka oras tungod kay kasagaran sa iyang gihimo, 15 ka mga minutos lang nga tagpilaw.
“Naa’y time nga makapiyong na gyud ko bisag gadagan tungod sa kaduka,” matod niya.
Gawas sa tulog, ang mga pagkaon sab ang angay bantayan sa preparasyon ug atol sa marathon, ingon ni Oporto.
Matod ni Oporto nga kinahanglan bantayan ang iyang food intake ug ang pag-inom tungod kay makaapekto kini sa iyang performance hilabi na ang pag-obserba sa iyang gipang-inom tungod kay bisan unsang orasa pwede siya ma-dehydrate o mas grabi pa, ma-heat stroke.
“Day and night man ang dagan maong kinahanglan gyud conscious ka sa tanang aspeto,” dugang ni Oporto.
Ang 47 anyos nga si Oporto nagsugod sa iyang career sa pagdagan sa edad nga 38.
Hunahuna ni Oporto kaniadto nga tanang tawo kay makadagan maong nakuryoso siya unsay naa sa maong duwa. Dihang iya kining gisuwayan, iyang nadiskubre nga ganahan siya sa maong career.
Sugod niadtong 2011, nagsunodsunod na nga marathon ang giapilan ni Oporto hangtod nahimo siyang usa sa nanag-unang marathoners sa Sugbo. (JJL)