Happy day, everyone! Tungod wala pa kita nangamatay hala desisyonan natong magpasalamat sa Kalangitan sa mga kaayo nag atong ginatagamtam.
KAPA-it kuno sa kape sa mga wala naka “Pay Out” karong mga panahona tungod sa sugo sa atong presidente, Rodrigo Roa Duterte (PRRD) nga hunungon ang transaksyon sa bisan unsa kunong “investment scams” dinhi sa Pinas.
Ang uban nagsalimuang kay ang kwartang gi-invest kay hinulaman apan ang uban nahuwasan sa dihang gihatod pasekreto sa ilang balay ang “blessing.” Aduna pod naghangad sa Kalangitan dala ampo nga makobra o mauli man lang ang kwartang hinaguan.
Dili ko manghilabot sa inyong persanal nga pagbuot kay inyo man kana, okey? Dili ta kaaway; ka “chicka” ra. Getch???
Sa pagkatinuod, wala ko nasayod kung adunay laing meaning ang pulong nga, “RISK-TAKER.” Diba ang pasabot ani kay nasayod kita nga bag-o kita nag-invest, dunay posibilidad nga dili mabalik ang atong kwarta, right? Mao bitaw, “for risk-takers only”, so, nganong mangasuko?
Ikaduhang pangutana, sa ngalan nga “donasyon” aron makatabang sa mga pobre, nganong mabalik sa tulo o lima ka pilo ang kwarta sa nagdonar?
Kinsa man gayud ang ginatabangan, ang gidonaran o ang nagdonar? Bulokbulok gayud ning inyong amiga mao pasayloa nga dili kaayo ko kasabot sa inyong sistema- SORRY. Nindot gayud kung gamiton kita sa Ginoo nga makatabang sa atong mga kaigsuonan.
Dili na lamang seguro ta maghulat nga mabalikan sa tawo kay ang Ginoo mismo ang mobubo sa mga panalangin Niya kanato.
Sa Mateo 6:3-4 nagkanayon nga kung kita motabang dili kuno nato pahibaluon ang walang kamot ngadto sa tuo kay nakakita ang Ginoo niini, ug Siya na ang magabalus kanato.
Isentro nato ang atong kalipay sa Ginoo kay bisan mangawala pa kita ning kalibotan, ang mga anak sa Dios, sa langit ang padulngan.
Mao kini atong kahinaman kay sa mansyon kita mamuyo tanan. Wala nay kasakit kauban ang Dios Amahan.
Ang “conditional happiness” mao ang kalipay nga nakabase sa mga “maayong butang, dakong kinitaan o nindot nga kahimtang. Kung mangawala kining mga kondisyona daw mangamatay pod ang paglaum sa katawhan, miga.
Ang “unconditional nga kalipay” wala nakabase sa sitwasyon apan sa kamatuoran nga luyo sa tanang sitwasyon anaay Dios nga atong kaduolan nga mohatag natog kaluwasan ug katagbawan nga wala dinhi sa kalibotan.