GIBISITA sa mga opisyal sa Social Security System (SSS) ang 13 ka mga kompanya sa dakbayan sa Mandaue niadtong Biyernes, Hunyo 13, sa buntag aron pagsuta sa reklamo nga wala kini motuman sa paghatag sa insaktong benepisyon sa ilang mga kawani.
Gisugdan ang operasyon sa usa ka pulong-pulong tali sa mga represenstante sa mga kompanya sa Mandaue nga gipahigayon sa City Time Square 2 sa alas 8:00 sa buntag, diin gipahinumdom ang employers sa ilang legal obligations.
Human ang kapin usa ka oras nga pulong-pulong, gisunod ang susama og pag-‘tokhang’ sa kadagkuan sa SSS nga gitawag og Run After Contribution Evaders (RACE) Team ngadto sa 13 ka mga kompanya.
Ang kalapasan naglakip sa delinquent sa paghatag sa contribution sa mga kawani, non-production of records, non-registration, ug non-reporting of employees.
Gipasabot ni Helen Solito, Senior Vice President sa Visayas Operations Group sa SSS, nga gitunong usab nila karon, samtang nagpadayon ang condonation alang sa mga penalty kalabot sa contribution sa mga kawani, gikan sa niadtong Marso hangtud na sa Setyembre 1, subay sa pagpatuman sa R.A. No. 11199 (Security Act of 2018).
Dungan sa ilang pagduaw, mao usab ang paghatag sa show cause order nga human sa 15 ka adlaw kon dili gihapon nila ma-insakto ang mga kalapasan, hayan nga pasakaan na og kasong kriminal ang tag-iya sa kompanya, kinsa mahimo nga mapriso ug mamultahan.
Ang mga kompanya nga gituyo sa SSS, nga gihulagway nga pilot area pa lang ning tuiga, ug magsilbi nga pasidaan sa uban pang malapason.
Mao kini ang ClintKAMMS Corp. Phialo Trading Corp., EFM Strading, Cherryl Serino, Soko Motorcycle Parts, Giardini del Sole, E-Styke & Inspiration Photography, YSS Motorshop, Unishop Enterprises, UNITE General Merchandise INC, RLB Apparel Shop, Cebruery, Artisanal Ales and Lagers Production, ug MA Consuelo Food Service.
Atol sa pagduaw ug personal nga paghatag sa show cause order, gipasabot ang mga naabtan nga kawani o representante sa kompanga nga ikaduha ka higayon na sila gipadad-an og demand letter, gibisita pa sa representante sa SSS aron matabangan sa pagparesulbar na sa ilang mga kalapasan, apan dul-an usa ka tuig ug ang uban kapin na sa usa ka tuig nga walay gihimong aksyon.
Ang kalihukan nga RACE ang simultaneous activity sa upat ka dapit sa nasud, naglakip na sa Visayas sa Mandaue City, National Capital Region sa Mandaluyong, laing usa sa Central Luzon sa Pampanga, ug Dipolog City alang sa Mindanao area.
Dugang ni Solito nga daku na kini nga tabang ilabi na nga katapusan nga naghatag og condonation sa penalty sa contribution, niadtong 2010.
Si Giovanni Boschi, tag-iya sa Giardini Del Sole nga usa sa sikat nga furniture manufacturing company, niatubang sa kadagkuan sa SSS ug nipasabot sa ilang habig kon ngano naglisud sila sa pag-contribute, ug nisaad hinuon nga mo-comply na niini.
Dugang ni Boschi nga tungod sa usa sa hinungdan nga naglisud sila sukad sa pagsugod sa negusyo niadtong tuig 2000.