SUPERBALITA CEBU

Migallen: Thompson, KD di babag sa Raptors

Taym pa

TALIWALA sa makasaysayon nga kadaugan sa Toronto Raptors, daghan gihapon ang nagduda sa ilang kapabilidad sa paglangkat sa una nilang titulo sulod sa 24 ka tuig sa National Basketball Association (NBA).

Wa kalikayi migawas ang mga negatibong komento tungod lagi kay nanga-injured ang mga sinaligan sa Golden State Warriors nga sila si Kevin Durant ug Klay Thompson sa nagpadayon nga series nga maoy naghatag og igong dalan sa Raptors aron maangkon ang kampiyonato.

Mahimong dunay punto kining maong reaksiyon, apan dili usab nato makuwestiyon ang gipakitang labok sa Toronto nga misugod pagluta sa playoffs pa lang daan.

Dili lalim ang pagpalagbot sa inilog nga Philadelphia Sixers (4-3) bisan pa man og naunhan sila sa series, 1-2. Ang pagpakaging usab sa inilog nga Milwaukee Bucks, ang no. 1 team sa tibuok season maoy naghatag og timaan sa ilang lig-ong determinasyon.

Laing sukaranan mao nga ang Warriors wa makadaug sa Raptors sa duha nila ka duwa sa regular season bisan pa man og hitsas sila sa puwersa.

Sa una nilang bagat, si Durant mipakatap og 51 puntos sa pagsulong sa Warriors didto sa korte sa Toronto apan napildi sila pinaagi sa overtime, 131-128.

Sa ikaduha nilang duwa nianang pagka Disyembre, giusban ang Warriors sa Raptors, 113-93, ning higayona, didto na gyud sa Oracle Center diin mipuga og 30 puntos si Durant.

Wa pa gani makaduwa si Kawhi Leonard sa maong kombati. Ug sa bag-ong natapos nga finals series, wa padag-a sa Raptors ang Warriors diha sa kaugalingon nilang korte sa tulo nila ka mga duwa – Games 3, 4 ug 6.

Tinuod nga makatabang og dako sa Warriors kon wala pa makakangkon og grabing injury sila si Durant ug Thompson apan di nato masalikway ang lig-ong determinasyon sa Raptors sa paglangkat sa titulo.

Atong gidayeg ang katakos sa Warriors nga bisan pa man sa pagkawagtang sa ilang mga lig-ong puwersa, nakapakita sila sa saktong kombati nga nakahatag usab og dakong hulga sa Raptors.

Apan sa kauwahi-an, sa ato nang gikaingon sa unahan, ang lig-ong determinasyon sa mga batan-on ug uhaw sa titulo nga Raptors maoy mipatugbabaw.

With or without Durant and Thompson, the Raptors were stepping on the right path to winning their first NBA championship. Congratulations Golden State for giving Raptors a good fight. Congratulations, Toronto for a job well done. (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph