Sugilanon: Ang sukli

Sugilanon: Ang sukli

AYNA lang kog isulod sa geyt sa terminal, Dong. Nausab akong hunahuna,” matod sa pasahero sa taksi nga gimaneho ni Freddie. Naglingkod ang pasahero nga hamtong nga lalake tupad niya sa front seat. Hapit na sila moabot tungod sa ‘entrance’ sa Cebu South Bus Terminal.

Naglibog si Freddie nganong nausab ang hunahuna sa pasahero.

“Asa na man diay ka pahatod, Sir?” ni Freddie nga milingi sa tuo ning taknaa sa kaadlawon nga wa pay alas kuwatro ang takna.

Ganihang mga alas tres imedya pa ang takna gipul-an si Freddie sa pag-estambay atubangan sa usa ka motel sa South Expressway. Kay nagduka siya, nakahukom siya nga moburdo-burdo aron pagwala sa duka. Gipadagan niya ang taksi subay sa V. Rama Ave. padulong sa Guadalupe. Pag-abot niya sa eskina padulong sa Guadalajara gipara siyag pasahero nga nagsambilay og itom nga bag sa tuong abaga. Suwerte siya kay siya ray nagdagan nga taksi. May daghang taksi nga nagparking atbang sa panaderiya nga Pan de Manila. Apan nangatulog pa ang ang mga drayber. Pagpaandar sa usa kay may pasaherong nakit-an ulahi na, kay si Freddie na ang nasinyasan.

Giurongan niya ang pasahero daplin sa V. Rama, saylog gamay sa eskina. Misakay ug milingkod kini sa front seat. Gisabak niya amg iyang bag.

“Maayong buntag, Sir!” ni Freddie.

“South Bus terminal, Dong,” matod sa pasahero

Gitumba dayon ni Freddie ang metro ug mipadagan sa taksi. Semi upaw ang tupi sa pasahero ug daw saysintahon na ang hitsura, apan maskulado og lawas. Wa siyay ‘abs’ ug light brown ang T-Shirt nga haom sa iyang lawas. Brown iyang karsones ug brown sab ang sapatos ug medyas. Tag-an lang kini ni Freddie kay di kaayo matataw ang mga tiil sa pasahero. Limitado man ang dan-ag ngadto sa iyang mga tiil. Wa ray kinse minutos nahiabot sila sa terminal.

“Dinhi lang ko naog gawas sa geyt, Dong,” sa pasahero.

“Okey lang, Sir,” ni Freddie. Gipahunong niya ang taksi sa daplin dapit sa tuo nga way ‘traffic sign.’

“Pilay patak, Dong?” sukna sa pasahero.

“P90.” ni Freddie.

“O,” sa pasahero nga mitunol og usa ka gatos ka pesos nga papel de banko.

Gidawat ang kuwarta ug mikuot o diyes pesos sa iyang sudlanan og sensilyo nga diha tupad sa kambiyuhan sa taksi.

“Ayna lang kog suklii, Dong,” sa pasahero. Giablihan niini ang pultahan apan wa pa mokanaog.

“Salamat, Sir!” ni Freddie.

“Mao nay akong nahunahunaan. Dinhi na lang ko manaog aron di ta kabayad og diyes pesos sulod sa terminal, kay ang ibayad ta nga diyes pesos imuhon na lang. Sige tag hatag og kuwarta sa gobyerno, unya ibulsa ra man sa nagdumala sa gobyerno!” matod sa pasahero dayong kanaog.

Nakapanglingo si Freddie nga nagkatawa. Abi man god niya nga pahatod sa laing lugar ang pasahero. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph