Vallena: Hinaut modaku pa

MAORAG nalingaw ang mga lumolupyo sa kabukiran sa Cebu City, kadtong giagian sa rota sa Cebu Epic sa Hunyo 9. Nalingaw gani ko bisan sa video ug pictures lang nagtan-awl. Daghan pa unta ang mangapil apan 260 lang ka mga tawo kun 130 ka teams ang gitugot sa ilang permit, matod sa akong higala nga si Engr. Allan Loyao.

Barato ra man gud ang registration sa usa ka pair, tag P2,500 ra. Apan tag kun discounted og P2,000 sa sayo nga nagpa-register.

Ang makalingaw sa ingon niani nga lumba ang portion nga lisod kun technical ang rota. Sa video, dunay usa ka portion nga dulhugon kaayo ug lapukon. Naay lingkuranan nga gibutang alang sa nagkuhag hulagway ug video shots.

Naay nangalamba, wa unta malamba apan nadala og ratol, natumba og iyaha ug uban pa. Naay uban successful unta, apan unsang pagkaunsaa, didto na sa unahan natukalbong. Bisan pa sa mao nga mga hitabo, gagmay lang ang injuries sa mga atleta.

Mga riders nagagikan sa Cebu, Cagayan de Oro, Bohol, Leyte, Negros, Davao, Surigao, Singapore ug Europe.

Nangapil sab ang mga Sugboanon nga inila sa biking community nga sila si Dongkey Sanchez, Niño Surban ug Joseph Miller.

Kinsay midaug niadtong June 9, 2019 Epic? Bisita lang sa Facebook page sa Cebu Epic. Naa tanang winners ug kompleto pa sa mga makalingaw nga hulagway.

Hinaut modako

Sa ubang mga lugar, ang ingon niani nga lumba sa endurance ug technical skill dugukon sa mga tawo ug turista. Gipaluyohan usab sa lokal nga mga kagamhanan. Apan dinhi sa atoa, wa ko makadungog nga giduso sa local government ang Cebu Epic. Kuwang pa man gani kaayo sa media exposure.

Tudluanan pa hinuon ang organizers unsaon sa pagkuhag interest sa publiko ning matanga sa lumba. Sa ingon niani nga event, gikinahanglan ang exposure aron mas makakuha og sponsorship ug mas maka attract og riders from other places kay mas daku na man ang premyo.

Unsay ayo ani sa mga business establishment nga namaligyag biseklita? Daku kaayo. The more nga ma-expose ang biking, the more ang mga tawo nga mamalit og biseklita. But sadly, kadaghanan inot mo-sponsor ang mga tindahan.

Turismo

Ang mountain biking maayo sa turismo. Daghang mga lugar sa kabukiran sa Dakbayan sa Sugbo nga maanindot, dunay lamiang mga pagkaon sama sa kalderitang kanding, linat-ang manok bisaya, mga tanaman sa utanon, falls, kasapaan.

Dinhi, angay nga ang Cebu City Government mosuporta sa ingon niani nga kalihukan sa paugnat sa kusog. Gawas nga nag-promote ni og healthy lifestyle, makadani usab ni og mga turista. Hinaut pa, mas modaku ang Cebu Epic kada tuig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph