MAY bag-ong serye ang Maja Salvador ug sa titulo pa lang kontrobersyal na ang dating kay “Killer Bride”.
O di ba! Maka-intriga paminawon ug daghang mga pangutana ang mitumaw mahitungod sa maong teleserye. Puno kaha kini sa madugo ug ma-aksyong eksena? O di ba kaha usa ka madugong love story? Unsa ug kinsa ba gyud kining “Killer Bride”?
Makauban ni Maja Salvador dinhi silang Geoff Eigenman ug ang bag-ong tambalan nga Janella Salvador ug Joshua Garcia.
Duha ka Salvador sa usa ka pelikula, makita nato si Maja ug Janella nga magtigi dili lang sa aktingan ug kaanyag kondi sa uban pa nilang talento, ay’g saba!
Si Joshua Garcia makita usab sa Mikhail Red’s zombie film ang “Block Z” kauban silang Julia Baretto, Yves Flores, Maris Racal, McCoy de Leon, Dimples Romana, Ina Raymundo ug Ian Veneracion.
Balik-tambalan dinhi ang “Mcris” nilang McCoy de Leon ug Maris Racal nga mas una pa sa labtim nga “Mclisse” McCoy ug Elisse Joson.
Karon nga buwag na ang “Mclisse” ug wala na usab si Iñigo Pascual sa kinabuhi ni Maris, mahatagan na kahag tsansa silang McCoy ug Maris? ay’g saba!
“Ang Hupa” ni Direk Lav Diaz nga bida si Shaina Magdayao nakasulod sa Cannes Film Festival.
Kauban ni Shaina dinhi silang Pinky Amador, Bituin Escalante ug Piolo Pascual.
Malipayon si Shaina sa maong proyekto kay unang higayon kini niya sa Cannes Film Festival. Apan gi-intriga na usab silang duha ni Piolo Pascual.
Dugay na kaayong nadungog nga may something ang duha pero wala man sab gyud silay konpirmasyon.
Daghan nang mga proyekto nga nag-uban ang Shaina ug Piolo mao nga mas nilawom ang ilang panagsuod. Pero unsa man gyud ang label sa ilang relasyon? Nganong naglikay si Shaina hisgutan si Piolo? Ay’g saba!