DALI kaayong makapanghimaraot si Presidente Rodrigo Duterte sa Amerika, European Union, ug Canada. Gani, nanghulga pa og gubat ang atong presidente tungod sa basura nga gikan sa Canada.
Apan, lahi ang China. Bisan og gibanggaan ug nalunod ang usa ka lantsa sa Pinoy nga mangingisda, hilom lang ang pangulo.
Kahinumdoman, gianunsyo ni Defense Secretary Delfin Lorenzana nga gibanggaan sa usa ka barko sa China ang F/B Gem-Vir samtang nag-angkorahe kini sa Recto Bank diha sa West Philippine Sea. Human gibanggaan, gibiyaan sa maong barko sa China ang 22 ka mga mangingisda nga nagkabuang og pangayog tabang.
Maayo na lang kay human gibiyaan sila sa barko sa China, niduol kanila ang usa ka barko sa Vietnam aron moluwas kanila.
Angay lang natong sagupon ang kamatuoran nga kini nahitabo diha sulod sa atong teritoryo nga dugay na sab giangkon sa China.
Samtang nangayog hustisya ang tag-iya sa barko ug ang mga mangingisda, wala pa makatingog si Presidente Duterte kabahin sa isyo.
Chill lang ta. Calibrated ang response sa atong presidente, matod pa ni Presidential Spokesman Sal Panelo.
Tingale, sakto lang sab gyud ang giingong calibrated response. Di man gyud patas ang tapad sa armadong kusog sa Pilipinas ug sa China.
Samtang ang AFP dunay 171,500 ka aktibong personnel sa miaging 2018, ang China kay duna nay 2,035,000 ka aktibong personnel. Wa pay labot ang mga ekipo nga panggubat.
Mao bisan pag mamangga og atong barko ang mga barko sa China, duko lang una kita ug pagpa-awt. Kay matod pa, di nato kaya ang all-out war batok sa China.
Apan kontento lang diay kita nga daugdaugon kay mahadlok kitang mangamatay?
Matag kanta nato og “Lupang Hinirang” labi na kon manan-aw kitag last full show sa sine, molitok man kita og “mamatay ng dahil sa iyo.” Mahadlok na diay kita nga tinud-on kini?
Mas maayo tingale nga magpakita nag labok si Presidente Duterte batok sa China bisan og insulto man lang. Di maayo alang kaniya nga nagpakitag kaisog batok sa Canada karong bag-o, apan mokakak diha batok sa China.
Unsaon man pagpanalipod sa atong Armadong Kusog kon ang ilang commander-in-chief di motingog batok sa China?
Kon calibrated man ang labok sa presidente, mas maayong mapakita na kini kay dili lang ang katawhan Pilipino ang nagsud-ong kon tinuod ba gyud siya nga isog, nagsud-ong sab ang tibuok kalibotan.
Klaro na man karon nga usa sa mga flashpoint sa kalibotan mao ang West Philippine Sea diin posibleng mobuto ang kagubot tali sa Amerika ug sa China. Tinuod angay magkinto si Presidente Duterte. Apan eek sab intawon. (@anol_cebu sa Twitter)