GISAULOG karong adlawa sa tibuok kalibutan ang Father’s Day. Adlaw karon sa mga amahan. Kon ang mga inahan maoy gi-ila nga iwag o suga sa matag pamilya, ang mga amahan usab maoy gi-ila nga haligi. Siya maoy gi-ila nga pundasyon sa pamilya. Siya maoy naghatag og kusog ug suporta aron makabarug ang iyang banay. Siya maoy sandiganan ug dangpanan sa matag sakop sa pamilya.
He is the protector, the provider of the family. Siya maoy magtudlo sa iyang mga anak kon unsay sayop o dili. Siya ang modisplina sa mga anak kon adunay dili maayo nga nahimo. Siya usab ang mogiya kanila alang sa tul-id nga dalan. Daghan og papel ang amahan.
Diin man magsugod kining selebrasyon sa Father’s Day ug nganong gisaulog kini matag ikatulong Dominggo sa Hunyo? Usa ka batan-ong babaye nga si Sonora Smart Dodd nga taga Spokane, Washington, maoy unang nagpauso niini sukad niadtong 1909. Si Sanora mitambong og misa, diin gituki sa Pastor atol sermon ang kabahin sa selebrasyon sa Mother’s Day. Na-una diay ang Mother’s Day celebration nga atong gisaulog matag ikaduhang Domingo sa Mayo kay sa Father’s Day.
Nakahuna-huna si Sonora nga mohatag og pasidungog sa iyang amahan nga si William Jackson Smart, usa ka civil war veteran. Ang iyang amahan maoy nagmatoto kanilang unom ka mga magsuon human mamatay ang iyang inahan samtang gipanganak si Sonora. Gusto unta ni Sonora nga ipahigayon ang Father’s Day matag Hunyo 5, atol sa birthday sa iyang amahan.
Nagsugod siya pagpakatap og mga petition ug position papers diin daghan ang mga miperma ug misuporta sa iyang kawsa. Iyang gidoul usab ang mga pulitiko sa Spokane aron suportahan ang iyang tinguha. Tuod man napahigayon ang unang selebrasyon sa Hunyo 19. 1910. Niadtong 1966, si Presidente Lyndon Johnson maoy unang mipagawas og official presidential proclamation nga nag-recognize sa Father’s Day. Ug niadtong 1972, si Presidente Richard Nixon maoy mipirma sa balaod nga opisyal nga nagdeklarar sa ikatulong Domingo sa Hunyo nga Father’s Day. Mao na nga ato usab kini gisaulog kay maayo ta mangopya. Ang ubang kanasuran misagop usab ini. Mabuhi ang mga amahan, bisan ang mga buluyagon. (bobbygnalzaro@gmail.com)