NAGSUGOD na og tumaw ang mga taho nga dunay mamiya nga mga sakop sa Bando Osmeña Pundok Kauswagan (BOPK) ug mamalhin ngadto sa Barug PDP Laban. Nagsugod ning mga estorya human sa eleksyon niadtong Mayo.
Nidaug man tuod sila si Mayor-elect Edgar Labella ug Vice Mayor-elect Mike Rama, ang mayoriya sa ilang mga konsehal wala madala. Mayoriya gihapon ang BOPK sa konseho. Aron makuha nila ang tumong ug tinguha sa partido nga way babag, gikinahanglan sa Barug ang mayoriya.
Sa BOPK, si outgoing Councilor Jerry Guardo maoy labing unang nipadayag nga mosuporta sa liderato ni Labella. Unsaon diay pagsuporta ni Guardo nga napilde man siya sa miaging eleksyon?
Duha ka mga konsehal sa BOPK, sila si Alvin Arcilla ug Sisinio Andales dunay nag-ung-ung nga disqualification nga mga kaso. Kon duna nay final nga hukom nga magtangtang kanilang duha, si Guardo nga maoy no. 9 ug si Konsehal Joel Garganera nga maoy no. 10, mangasulod. Nagpasabot nga duha ang madugang sa Barug sa Cebu City north.
Gawas sa duha, dunay mga hungihong nga dunay mga sakop sa BOPK ang mamalhin. Kon kini mahitabo, posibleng makuha sa Barug ang mayoriya sa di pa matapos ang tuig.
Pinaagi niini, ang tanang tinguha sa Barug kaniadto sa panahon ni Rama, labina sa South Road Properties (SRP), mahitabo na. Usa na niini ang pagpapas sa P2 bilyunes nga nahabiling utang sa Siyudad. Apan gikinahanglan una resolbahon ang giingong panagbikil sa sud sa Barug PDP Laban una sila mangambisyon sa pagkuha sa mayoriya.
Gikinahanglan nga ilhon ni Rama ang liderato ni Labella nga mao na karon ang naghupot sa ryenda. Kon gisuportahan siya ni Labella kaniadto, kanus-a hapit tanan namiya niya, iya usab unta suklian ang pag-unong sa bise mayor kaniya. Gikinahanglan nga iyang respetuhan, di kay moingon siyang di magpagawong ug magpadiktar ni bisan kinsa.