SECTIONS
Thursday, July 18, 2019
SUPERBALITA CEBU

Dul-an P1 milyones balor sa drogas nasakmit

DUL-AN sa usa ka milyon ka pesos nga balor sa illegal nga drugas sa siyudad sa Sugbo atol sa managlahing anti drug operation nga gihimo sa Cebu City Police Office ug sa Drug Enforcement Group 7 gahapon sa kaadlawon Hunyo 15.

Sa Sitio Ipil-Ipil, Alaska Mambaling duha ka tawo ang nasikop sa gihimong buy bust operation sa Pardo Police Station nga gipangulohan sa ilang hepe nga si Police Major Regino Maramag alas 6:45 gahapon sa buntag Hunyo 15.

Ang mga nangadakpan mao silang Jeric Maranga, 23, ug Evangeline Mijares, 39, pulos taga Belgium street barangay Suba sa siyudad sa Sugbo.

Nakuha gikan kanila ang mga pinakete sa ginadiling drugas nga motimbang sa 100 grams nga mobalor ang tanan sa P680,000.

Nakadawat og impormasyon ang kapulisan sa Pardo labot sa ilegal nga kalihukan sa duha.

Sila usab ang gitumbok sa mga mangadakpan sa Pardo nga kuhaanan sa ilegal nga drogas.

Samtang nadakpan usab sa Drug Enforcement Group- Central Visayas (DEG 7) ang usa ka sakop sa giilang big time illegal drug group sa siyudad sa Sugbo nga nag operate sa Barangay Carreta.

Ang nasikop mao si Jane Ruby alyas Badiday nga taga A. Soriano, Barangay Carreta.

Nakuha gikan kaniya ang usa ka bulto sa gituohang shabu nga motimbang sa 25 grams nga mokantidad sa P 170,000.

Gipaubos siya karon sa imbestigasyon labot sa iyang illegal nga negosyo ilabi na kung asa niya kuhaon ang supply sa illegal nga drugas.

Si Lieutenant Colone Glenn Mayam, ang hepe sa DEG 7, nagkanayon nga aduna na silay pangalan sa drug group diin na membro si Ruby.

Sa Waterfront Police Station nasikop usab ang laing tulo ka mga street level nga pusher atol sa ilang anti-drug operation nga gisugdan gahapon sa kaadlawon pinangulohan usab sa hepe niini nga si Police Major Joemar Pomarejos.

Unang nasikop mao si Teofilo Juanico, 54, usa ka barbero nga taga Villagonzalo 1, Barangay Tejero.

Ang mga operatiba armadog search warrant batok kang Juanico nga giluwatan ni Judge Pamela Baring sa Regional Trial Court (RTC) 7 Branch 21.

Nakuha kaniya ang mga putos sa ilegal nga drogas nga mobalor sa P44,472.

Pagka alas 2 sa kaadlawon nasikop usab nila ang laing drug personality sa sitio Looban, Villagonzalo 2 sa Barangay Tejero.

Ang nasikop giila nga si Robert Bayate Manapsal alyas Poloy nga nag puyo ra usab sa maong lugar.

Migintang lang sa usa ka oras nga operation nadakpan na usab nila ang usa ka 33 anyos nga si Melard Dela Cruz sa Quezon Boulevard sa Barangay Sto. Niño sa siyudad sa Sugbo nga nakuhaan ug mga pinutos sa gituohang shabu. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph